ԶԼՄ–ները հայտնում են, որ Երևանում մեքենան վթարվել է ՆԳ նախարարի շարասյան համար ճանապարհը փակելու պատճառով. ոստիկանությունը պարզաբանում է

ԵՐԵՎԱՆ, 9 հունիսի./Նովոստի–Արմենիա/. Համացանցում հրապարակում է տարածվել Գրիգոր Լուսավորչի փողոցում նախօրեին առավոտյան տեղի ունեցած վթարի վերաբերյալ:

Նշվել է, որ վթարը տեղի է ունեցել ՆԳ նախարարի ավտոշարասյան համար ճանապարհը մասնակի փակելու պատճառով:
Ոստիկանությունից պարզաբանում են, որ ՆԳՆ ներքին անվտանգության վարչությունում նշված ճանապարհատրանսպորտային պատահարով արդեն իսկ նշանակված է ծառայողական քննություն:

«Ծառայողական քննության շրջանակում քննարկման առարկա կդառնա նաև ուղեկցող անձնակազմի գործողությունների պատճառահետևանքային կապը տեղի ունեցած վթարի հետ», – նշվում է գերատեսչության հաղորդագրության մեջ:

Բացի այդ, նախաքննական մարմնում նախաձեռնվել է քրեական վարույթ: Արդյունքների մասին լրացուցիչ կտեղեկացվի:–0–