Երևանում 35-ամյա տղամարդը՝ թաղապետարանի աշխատակից ներկայանալով, փորձել է կողոպտել թոշակառու կնոջը (ՎԻԴԵՈ)

15:06

13 Մարտի 2020

ԵՐԵՎԱՆ, 13 մարտի. /Նովոստի-Արմենիա/. Երևանում թաղապետարանի աշխատակից ներկայացած անձը փորձել է կողոպտել թոշակառուին, այս մասին հայտնում է ՀՀ ոստիկանության մամուլի ծառայությունը:

Դեպքը տեղի է ունեցել Մալաթիա-Սեբաստիա վարչական շրջանում՝ փետրվարի 28-ին:
Օրը ցերեկով ինչ-որ մեկը մտել է Օհանովի փողոցի շենքերից մեկը, բարձրացել չորրորդ հարկ, թոշակառու տանտիրուհուն՝ ներկայանալով որպես թաղապետարանի աշխատակից` բնակարան է մտել, կապել միայնակ կնոջ ձեռքերն ու բերանը, տունը տակնուվրա անելուց հետո հափշտակելու հարմար բան չգտնելով` փախել:

Ըստ ոստիկանության հաղորդման՝ դեպքից րոպեներ անց կատարվածի վերաբերյալ ոստիկանության Մալաթիայի բաժնում ահազանգ է ստացվել: Իրավապահներն անհապաղ Օհանովի փողոց են մեկնել:

Քրեական հետախույզները լսել են տուժողին, ուսումնասիրել բնակարանը:

Դեպքի առթիվ հարուցվել է քրեական գործ:

Կողմնորոշումներ են ուղարկվել ոստիկանության մյուս ստորաբաժանումներ: Մշակվել է օպերատիվ միջոցառումների պլան: Տրվել է համապատասխան հանձնարարականներ թե՛ քրեական հետախույզներին, թե՛ համայնքային ոստիկաններին: Եվ դեպքից օրեր անց հետևողական աշխատանքը դրական արդյունք է տվել:

«Բացահայտման ուղղությամբ ձեռնարկված լայնածավալ որոնողական աշխատանքի արդյունքում տեղեկություններ ստացվեցին, որ հանցագործությունը հնարավոր է կատարած լինի Հաղթանակ փողոցի 35-ամյա մի բնակիչ: Մարտի 1-ին կասկածվողը Շերամի փողոցից բերման ենթարկվեց ոստիկանության Մալաթիայի բաժին և տվեց խոստովանական բացատրություն»,- ասվում է հաղորդագրության մեջ:

Դեպքի հանգամանքները պարզվում են:
Հարուցված քրեական գործի նախաքննությունը շարունակվում է:

Ծանոթացեք լուրերին առաջինն ու քննարկեք դրանք մեր Telegram-յան ալիքում

#թոշակառու #կողոպուտ #թաղապետարանի աշխատակից

Թեմատիկ նյութեր