Մայրը փայտով վռնդել է ընձառյուծին և փրկել 6-ամյա դստեր կյանքը

ԵՐԵՎԱՆ, 13 փետրվարի./Նովոստի-Արմենիա/. Հնդկաստանի գյուղերից մեկի բնակչուհի Գերդան փայտով պայքարել է ընձառյուծի հետ, որը հարձակվել է նրա վեցամյա դստեր վրա։ Վայրի կատուն հարձակվել է աղջկա վրա, երբ նա տան բակում խաղալիս է եղել, գրում է infozoid.ru-ն:

India Times-ի հաղորդմամբ, ընձառյուծը փորձել է տանել երեխային, սակայն մայրը դուրս է վազել, երբ լսել է դստեր ճիչերը։ Առանց վարանելու, նա փայտ է վերցրել և հարձակվել կենդանու վրա։ Ընձառյուծը վայր է գցել աղջկան ու փախել։

Միջադեպի հետևանքով երեխան դեմքի եւ գլխի լուրջ վնասվածքներ է ստացել։ Նա հոսպիտալացվել է։ Ըստ բժիշկների՝ երեխան ծայրահեղ ծանր վիճակում է։

Տեղեկանալով միջադեպի մասին՝ դեպքի վայր են ժամանել անտառտնտեսության ներկայացուցիչները։ Ենթադրվում է, ընձառյուծը գյուղ է եկել Նանպարա արգելոցից։-0-