«Դաստիարակչական» ավտոառևանգում Վանաձորում. 62–ամյա տղամարդն առևանգել է ընկերոջ մեքենան (ՎԻԴԵՈ)

ԵՐԵՎԱՆ, 15 սեպտեմբերի./Նովոստի–Արմենիա/. Սեպտեմբերի 13-ին, ժամը 17.30-ին, ոստիկանության Վանաձոր քաղաքի Բազումի բաժին հաղորդում տվեց Տարոն թաղամասի 67-ամյա մի բնակիչ. ժամը 2.00-2.15-ն ընկած ժամանակահատվածում առևանգել էին Աղայան փողոցի մի շենքի բակում կայանված «Մերսեդես Բենց» մակնիշի ավտոմեքենան, որը շահագործում էր որպես տաքսի, հաղորդում է ՀՀ ոստիկանության մամուլի ծառայությունը:

Իրավապահներն այցելեցին նույն թաղամասում բնակվող մի 62-ամյա տղամարդու տուն, բայց նա տանը չէր: Օպերատիվ-հետախուզական միջոցառումներին զուգահեռ ոստիկանները նաև որոնում էին մեքենան: Ի վերջո, բացատրական աշխատանքի արդյունքում 62-ամյա տղամարդը փախցրած ավտոմեքենայով ներկայացավ բաժին:

Ավտոմեքենան տեղափոխվեց բաժնի պահպանվող հատուկ տարածք:

«Պարզվեց, որ տուժողն ու փախցնողը մտերիմ ընկերներ են: Իսկ թե ինչու էր փախցրել ընկերոջ մեքենան` 62-ամյա տղամարդը պատասխանեց, որ օրեր առաջ իրենց շենքի բակում նա անփութորեն կորցրել է մեքենայի բանալին, որն ինքն է գտել, և այդ օրն էլ փորձել է դաս տալ ընկերոջը, որ այսուհետ ուշադիր լինի», – նշվում է հաղորդագրության մեջ:

Հանգամանքներն, այնուամենայնիվ, պարզվում են:-0-