Ծեծելով սպանել են տղամարդուն ու դին արկղով տեղափոխել. Վեդիում կատարված ահասարսուռ սպանության մանրամասները (ՎԻԴԵՈ)
15:20
11 Հունվարի 2021
ԵՐԵՎԱՆ, 11 հունվարի./Նովոստի–Արմենիա/. ՀՀ ոստիկանությանը բացահայտել է Վեդիում կատարված սարսափելի սպանությունը։
Ինչպես հաղորդում է ՀՀ ոստիկանության մամուլի ծառայությունը, հունվարի 8-ին Վեդի քաղաքից Քաղցրաշեն գյուղ տանող դաշտամիջյան ճանապարհով անցնող մի տղամարդ արկղր էր տեսել, մեջը՝ տղամարդու դի։ Ժամը 12.45-ին նա ահազանգել էր ոստիկանություն։ Ահազանգի հետքերով մեկնած ոստիկանության Արարատի բաժնի օպերատիվ խումբը պարզեց, որ արկղում 59-ամյա Պետրոս Ամիրխանյանի դին էր։
«Դատաբժիշկը մարմնի զննությամբ բռնության հետքեր հայտնաբերեց։ Տարածքային քննչական բաժնում սպանության հատկանիշներով քրեական գործ հարուցվեց։ Առանձնապես ծանր հանցագործության բացահայտմանն ուղղված ոստիկանության Արարատի բաժնի ծառայողների միջոցառումներին միացան Քրեական ոստիկանության գլխավոր, Երևան քաղաքի և Արարատի մարզային վարչությունների գործընկերները։ Համատեղ աշխատանքի արդյունքում տեղեկություններ ձեռք բերվեցին, որ տղամարդուն ծեծելով սպանել են հունվարի 5-ին։ Նախնական տվյալներով՝ Վեդի քաղաքի Թումանյան փողոցի բնակարաններից մեկում մի քանի անձի, այդ թվում՝ անչափահասների մասնակցությամբ հացկերույթ էր եղել։ Կենցաղային հարցի շուրջ վեճ էր ծագել։ Այդ ընթացքում 59-ամյա տղամարդուն մի քանի հոգով ծեծել էին՝ պատճառելով կյանքի հետ անհամատեղելի վնասվածքներ», – նշվում է հաղորդագրության մեջ։
Загружается новость ... "Лево"
Դեպքից երկու օր անց անչափահասներից մեկը հոր տաքսի ավտոմեքենան բերել էր կացարանի մոտ, որտեղից էլ փայտե արկղով դին տեղափոխել էին Վեդիից Քաղցրաշեն գյուղ տանող դաշտամիջյան ճանապարհ ու թողել այնտեղ։
Ոստիկանության ծառայողները նույն օպերատիվությամբ հայտնաբերեցին նաև կասկածվողներին, որոնք բերման ենթարկվեցին Արարատի բաժին, ապա ներկայացվեցին Վեդիի քննչական բաժին՝ հարցաքննության։ 4 անձ, այդ թվում՝ 15-ամյա երկու պատանի ձերբակալվել են։
Դեպքի բոլոր հանգամանքները պարզելու ուղղությամբ օպերատիվ-հետախուզական միջոցառումներն ու քննչական գործողությունները շարունակվում են։ Կատարվում է նախաքննություն։–0–
