Ավանում երիտասարդը երկաթե շղթայով մտնում է խանութ ու սկսում անկանոն պտտել` վնասելով աշխատակիցներին (ՎԻԴԵՈ)

ԵՐԵՎԱՆ, 30 հունվարի./Նովոստի–Արմենիա/. Ավանի հանրախանութներից մեկի տեսագրող սարքը ֆիքսել է, թե ինչպես մի երիտասարդ մոտենում է դրամարկղին ու ձեռքին ամրացրած երկաթե շղթան անկանոն պտտեցնում՝ պահանջելով գումար։

Չնայած նրա մոտ կանգնած անձինք, այդ թվում՝ գանձապահը, արագ փախչում են, սակայն շղթան վնասում է նրանցից մի քանիսին, հաղորդում է ՀՀ ոստիկանության մամուլի ծառայությունը։

«Հանրախանութում գտնված երիտասարդներից մեկը, խիզախություն դրսևորելով, խփում է հարձակվողի դեմքին ու նրան գետնին տապալում։ Այդ ընթացքում աշխատակիցներից մեկն արդեն ահազանգել էր ոստիկանություն։ Արագ արձագանքած Ավանի քրեական հետախույզները շղթայավորին բերման ենթարկեցին բաժանմունք։ Պարզվել է, որ նա Երևանի բնակիչ է, 22 տարեկան։ Երիտասարդը ոստիկանությունից ներկայացվել է տարածքային քննչական բաժին ու ձերբակալվել», – նշվում է գերատեսչության հաղորդագրության մեջ։

Ավազակային հարձակման փաստով հարուցված քրեական գործի նախաքննությունը շարունակվում է։–0–