ԵՐԵՎԱՆ, 1 հուլիսի. /Նովոստի–Արմենիա/. Աղմկահարույց տեսանյութի «հերոս» դարձած ՃՈ աշխատակիցներն ազատվել են զբաղեցրած պաշտոններից։
«Ռազմավարական բիզնես» կրթական և խորհրդատվական կենտրոնի հիմնադիր և գործադիր տնօրեն Վահրամ Միրաքյանը հինգշաբթի Facebook սոցցանցի իր էջում տեղադրել էր տեսանյութ Ճանապարհային ոստիկանության աշխատակիցների հետ գրանցված կոնֆլիկտի մասին։
Միջադեպը տեղի է ունեցել Աշտարակ–Ապարան ավտոճանապարհին։ ՃՈ աշխատակիցները կանգնեցրել են Միրաքյանին արագությունը գերազանցելու համար, և նա պահանջել է իրավապահներից ցույց տալ տեսագրությունը` այդ ամենը նկարահանելով բջջային հեռախոսի տեսախցիկով։ Լեզվակռվից հետո ոստիկաններից մեկը խլել է Միրաքյանի հեռախոս և փորձել ջնջել տեսագրությունը։ Միրաքյանի խոսով` ավելի ուշ նրա հեռախոսը վերադարձրել են, սակայն պահանջել, որպեսզի նա ջնջի տեսագրությունը, սակայն նա չի կատարել պահանջը։
«Միջադեպի կապակցությամբ ՀՀ ոստիկանության պետի հանձնարարությամբ նշանակվել է ծառայողական քննություն: Միջադեպին մասնակից երկու ճանապարհային ոստիկաններն ազատվել են զբաղեցրած պաշտոններից և գրանցվել կադրերի ռեզերվում: Ծառայողական քննությունը շարունակվում է», – նշվում է ՀՀ ոստիկանության մամուլի ծառայության տարածած հաղորդագրության մեջ։–0–