ԵՐԵՎԱՆ, 17 հոկտեմբերի. /Նովոստի–Արմենիա/. Ուկրաինայի Ուժգորոդ քաղաքում սպանվել է «Ապարան» կոշիկի ֆաբրիկայի գլխավոր տնօրեն Անդրանիկ Ն.–ն, հաղորդում է
newsone.ua–ն` հղում անելով
Mukachevo.net տեղական հրատարակությանը։
Ոստիկանության նախնական տվյալներով, սպանությունը տեղի է ունեցել երկուշաբթի` հոկտեմբերի 16–ին, ժամը 11։00–ի սահմաններում թոփ–մենեջերի աշխատասենյակում։ Գործարարի ուղղությամբ արձակվել է մի քանի կրակոց։
Նշվում է, որ անմիջապես դեպքի վայր է մեկնել քննչական–օպերատիվ խումբը։
Իրավապահները ձերբակալել են կասկածյալին, նա հարցաքննվում է։ Միաժամանակ, նշվում է, որ սպանության դրդապատճառները դեռ անհայտ են։ Ոչ պաշտոնական տեղեկատվության համաձայն` սպանությունը տեղի է ունեցել անձնական կոնֆլիկտի ֆոնին։
Ավելի ուշ հայտնի է դարձել, որ ֆաբրիկայի տնօրենի և նրա զրուցակցի միջև վեճ է բռնկվել, ինչի հետևանքով 54–ամյա տղամարդը 4 անգամ կրակել է տնօրենի ուղղությամբ, ով տեղում մահացել է։
Դեպքի վայրից առգրավվել է 7,65մմ տրամաչափի ատրճանակ` մեկ փամփուշտով, որից կրակել է կասկածյալը։ Զենքն ուղարկվել է փորձաքննության։
Փաստի առթիվ հարուցվել է քրեական Ուկրաինայի ՔՕ 115–րդ հոդվածով (կանխամտածված սպանություն), որը նախատեսում է 7–15 տարվա ազատազրկում։ Քննչական գործողությունները շարունակվում են։–0–