ԱԱԾ-ն հավաստիացրել է, որ բանակցությունները Երևանի ՊՊԾ գնդի շենքը զավթած խմբավորման հետ չեն ձախողվել. Ենիգոմշյան

ԵՐԵՎԱՆ, 19 հուլիսի. /Նովոստի-Արմենիա/. Ազգային անվտանգության ծառայությունը հավաստիացրել է, որ Երևանի ոստիկանության պահակապարեկային ծառայության գնդի շենքի զավթման հետ կապված իրավիճակի շուրջ բանակցությունները չեն ձախողվել, հայտնել է զինված խմբավորման անդամներից Ալեք Ենիգոմշյանը:

Ենիգոմշյանը հանդես է գալիս որպես զավթիչների և իշխանությունների միջնորդ:

«Ինձ հավաստիացրել են, որ բանակցությունները չեն ձախողվել: Ես անկեղծորեն ուրախ եմ և գոհ այդ փաստի կապակցությամբ», - ասել է նա:

Նա ավելացրել է, որ այժմ հարկավոր է խուսափել իրավիճակը սրող և լարվածությունն ավելացնող քայլերից:

Ենիգոմշյանը նշել է նաև, որ անհրաժեշտ է վերականգնել հեռախոսային կապը զինված խմբավորման հետ:

Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։

Զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։ -0-