Անգամ Ferrari–ն և Lamborghini–ն են կեղծում. հայտնաբերվել է կեղծ մեքենաների գործարան

ԵՐԵՎԱՆ, 20 հուլիսի./Նովոստի–Արմենիա/. Բրազիլիայի Սանտա Կատարինա նահանգի ոստիկանությունը կեղծ Ferrari–ների և Lamborghini–ների գործարան է հայտնաբերել։ 

Ինչպես գրում է motor.ru–ն, կեղծ մեքենաները հնարավոր էր գնել համացանցի միջոցով իրական մոդելի արժեքի 8 տոկոսով։

Իրավապահների տվյալներով, կեղծ մեքենաներն արտադրվում էին Իտաժայի քաղաքում, մեքենաները մատակարարվում էին ողջ երկրի տարածքում սոցցանցում ձևակերպված նախնական պատվերի միջոցով։ Ապօրինի բիզնեսով զբաղվում էին հայր և որդի, ում անունները չեն հրապարակվում։ Նրանք ձերբակալվել են, այնուհետև ազատ արձակվել երկրից չբացակայելու ստորագրությամբ։

Գաղտնի գործարանում կատարված խուզարկությունների ընթացքում հայտնաբերվել են ութ գրեթե պատրաստ սուպերքարեր, ինչպես նաև ձուլման համար նախատեսված դետալներ և պահեստամասեր։

Ferrari–ի և Lamborghini–ի ներկայացուցիչներն իրենց հերթին արդեն հայց են ներկայացրել իրենց արտադրանքն ապօրինի նմանակելու համար։–0–