ԵՐԵՎԱՆ, 26 մայիսի. /Նովոստի–Արմենիա/. 2015 թվականի մայիսի 26-ին «Հայփոստ» ՓԲԸ-ն մարեց և շրջանառության մեջ դրեց նոր նամականիշ` նվիրված բանաստեղծ, ֆրանսիական Դիմադրության շարժման մարտիկ, Ֆրանսիայի ազգային հերոս Միսաք Մանուշյանին:
Նամականիշը մարելու արարողությունն անցկացվեց «Հայփոստ» ՓԲԸ-ի ուսումնական կենտրոնում։ Միսաք Մանուշյանը նամականիշի վրա պատկերված է Փարիզի Հաղթական կամարի, «Կարմիր պաստառի» և Անմար կրակի, ինչպես նաև իր կնոջը՝ Մելինե Մանուշյանին ուղղված նամակի հատվածի խորապատկերին:
«Կարմիր պաստառը», որի վրա պատկերված էին Մանուշյանի և նրա ընկերների դիմանկարները, տարածել էր ֆաշիստական զորքը` ընդհատակյա գործիչներին հայտնաբերելու նպատակով:
Նամականիշի պատրաստման գործում մեծ աջակցություն է ցուցաբերել Ֆրանսիայում ՀՀ դեսպանատունը:
«Նամականիշը շրջանառության մեջ դնելը հարգանքի տուրք է մարդկանց, ովքեր, գտնվելով հայրենիքից, հարազատ մշակույթից և պատմությունից հեռու, ամեն ինչ արել են, որպեսզի բարձր պահեն հայի հեղինակությունը»,– նշեցին նախագծի նախաձեռնողները։
«Միսաք Մանուշյանի պատկերով նամականիշի թողարկումը կայացավ հայ և ֆրանսիացի ժողովուրդների համար նշանակալի տարում` ֆաշիզմի դեմ հաղթանակի 70–ամյակին։ Մենք իսկապես պետք է հպարտանանք հայ ժողովրդի արժանավոր զավակ Միսաք Մանուշյանով, իսկ Ֆրանսիան պետք է հպարտանա, որ նման քաղաքացի է ունեցել»,– ասաց Հայաստանի տրանսպորտի և կապի փոխնախարար Գագիկ Թադևոսյանը։
Հայաստանում Ֆրանսիայի արտակարգ և լիազոր դեսպան Ժան–Ֆրանսուա Շարպանտյեն նշեց, որ Միսաք Մանուշյանի ճակատագիրը բնորոշ է երկու երկրների համար։ Նա դժվար մանկություն է ունեցել` դառնալով Հայոց ցեղասպանության զոհ և շատ երիտասարդ հասակում կորցնելով իր ծնողներին։
«Փախչելով Ֆրանսիա` Մանուշյանը ճանաչել է այն որպես իր երկրորդ հայրենիք և պաշտպան կանգնել նրան` շարունակելով իր ծնողների` բռնության և դաժանության դեմ պայքարը։ Մանուշյանը հերոս է, որը ցույց տվեց, որ կարելի է սեփական կյանքը զոհել հանուն իր ժողովրդի, ինչպես նաև երկրի ազատության, որը ապաստան է տվել քեզ»,– նշել է Շարպանտյեն։
Միսաք Մանուշյանը ծնվել է 1906 թվականին Արևմտյան Հայաստանի Աղիյաման հայկական գյուղում: 1915 թվականի Հայոց Ցեղասպանության ժամանակ զրկվելով ծնողներից, հայտնվել է Սիրիայի ֆրանսիական մանկատանը, որտեղ և սովորել է ֆրանսերեն և ծանոթացել ֆրանսիական մշակույթին: 1925 թվականին տեղափոխվելով Ֆրանսիա, նա ակտիվ գործունեություն է ծավալել՝ հայերին իր շուրջը համախմբելով, գրական ամսագրեր հրատարակելով, անմասն չմնալով Ֆրանսիայի կյանքում տեղի ունեցող իրադարձություններից:
Նացիստական զորքերի կողմից Ֆրանսիայի բռնազավթումից հետո Մանուշյանը ստեղծել է Ֆրանսիական դիմադրության շարժման ինտերնացիոնալ խումբ, սակայն նրան խմբի հետ միասին ձերբակալել են 1943 թվականին և երեք ամիս անց գնդակահարել: Մանուշյանն ընդամենը 37 տարեկան էր:-0-
