ԵՐԵՎԱՆ, 28 հոկտեմբերի. /Նովոստի–Արմենիա/. Տասնյակ ձեռքի աշխատանքներ էին ներկայացվել բարեգործական ցուցահանդես–վաճառքում, որն անցկացվեց չորեքշաբթի սահմանափակ կարողություններով երեխաների սոցիալական ինտեգրման հարցերով զբաղվող «Մայրի» կազմակերպությունում։ Ցուցահանդեսում ներկայացվել են «Մայրի» կազմակերպության սաների պատրաստած աշխատանքները։
«Մեր շրջանավարտներն ավարտել են իրենց պարապմունքները Կենտրոնում, և նրանք ոչնչով չէին զբաղվում, հենց այդ պատճառով մենք որոշեցինք ինչ–որ օգտակար բան անել ավագ սերնդի համար։ Արդյունքում այստեղ երեխաները շփվում են, զարգացնում վարպետությունը, որ իրենց պետքական զգան»,– «Նովոստի–Արմենիա» գործակալությանն ասաց «Մայրի» բարեգործական կենտրոնի տնօրեն Զառա Մանուկյանը։
Ըստ նրա` Կենտրոնում նաև սովորում են երեխաներ, ովքեր չգիտեն գրել ու կարդալ, և նրանց համար գոյություն ունեն հատուկ ուսումնական ծրագրեր, որոնք բարենպաստ ազդեցություն են ունեն նրանց առողջության վրա։ «Նշանակություն չունի հիվանդության ծանրությունը, եթե պրոֆեսիոնալ կերպով աշխատես ցանկացած երեխայի հետ, ապա կարելի է հասնել գերազանց արդյունքների»,– նշեց Մանուկյանը։
«Սահմանափակ կարողություններով երեխաները հիմնականում աշխատում են կենտրոնում։ Մենք ունենք բրդի մշակման, ձեռքի աշխատանքի, կերամիկայի, մոմի, փայտամշակման արհեստանոցներ և խոհանոց»,– ավելացրեց բարեգործական կենտրոնի տնօրենը։
Նա նշեց նաև, որ կենտրոնը պետությունից դոտացիա չի ստանում, և իրերից գոյացած գումարները կգնան նյութերի, սննդամթերքի գնմանը և աշխատողների աշխատավարձերին։
«Մեր սաները միշտ ուրախ են հյուրերին, իսկ նմանատիպ ցուցահանդես–վաճառքները խրախուսում են նրանց»,– ավելացրեց Մանուկյանը։
Գերմանիայից ժամանած ուսուցիչ Մարիա Լուիզին, ով մանկավարժներին ձեռքի աշխատանք է սովորեցնում, արդեն երկրորդ անգամ է Հայաստանում։ «Ես ձեռքի աշխատանքի սեմինարներ եմ անցկացնում, և մենք պատրաստում ենք տարբեր իրեր` կտորից կենդանիներ, որակյալ գուլպաներ և ոչ միայն»,– ասաց գերմանացի մասնագետը «Նովոստի–Արմենիա» գործակալությանը։
Երևանի «Մայրի» հասարակական կազմակերպությունը զբաղվում է սահմանափակ կարողություններով երեխաների և դեռահասների սոցիալական ինտեգրման խնդիրներով։ Ցուցահանդեսում ներկայացված են կենտրոնի սաների պատրաստած բացիկները, էջանիշները, կերամիկական իրերը, մոմերը, ձեռագործները։ -0-
