ԵՐԵՎԱՆ, 15 օգոստոսի. /Նովոստի-Արմենիա/. Capital Cities ամերիկյան հինդի-փոփ խմբի մենակատար Սեպուհ Սիմոնյանն առաջին անգամ երեք համերգ կունենա Հայաստանում, ուրբաթ լրագրողներին տեղեկացրեց երգիչը:
«Ես շատ ուրախ եմ, որ ինձ հաջողվել է այցելել իմ հայրենիք, ուրախ եմ, որ կարող եմ ձեզ ներկայացնել ինչպես Capital Cities-ի ստեղծագործությունները, այնպես էլ` իմ առանձին աշխատանքները», - ասաց երգիչը:
Ծրագրի շրջանակում Սիմոնյանը կենդանի կատարմամբ երեք համերգ կունենա Երևանում՝ օգոստոսի 15-ին, 17-ին և 20-ին:
Համերգին ելույթ կունենա նաև հայտնի դուդուկահար Ջիվան Գասպարյան-կրտսերը, Bambir խմբի մենակատար և երգերի հեղինակ Նարեկ Բարսը (Բարսեղյան), ԱՄՆ-ում ելույթ ունեցող երգչուհի Սոսե Քեշիշյանը:
«Մինչ Հայաստան այցելելը երգչուհի Քեթի Փերրիի հետ համատեղ համերգային շրջագայության շրջանակում խումբը հասցրել է այցելել Ճապոնիա, Հարավային Կորեա, Մեքսիկա: Մինչև տարեվերջ մենք նախատեսում ենք համերգներ կազմակերպել Հարավային Ամերիկայի երկրներում, Ռուսաստանում, ինչպես նաև համերգային շրջագայություն կազմակերպել ԱՄՆ-ում», - տեղեկացրեց արտիստը:
Անդրադառնալով նոր նախագծերին՝ դերասանն ասաց, որ խումբը նոր երգ է ձայնագրել ամերիկահայ երգիչ, Serj Tankian նախագծի հիմնադիր Սերժ Թանգյանի հետ: Նրա խոսքով՝ նոր երգը շուտով կթողարկվի, իսկ մինչև տարեվերջ Capital Cities խումբը նախատեսում է համերգային շրջագայություններ կազմակերպել տարբեր երկրներում՝ ներկայացնելով «In A Tidal Wave Of Mystery» ալբոմը, իսկ որոշ հանգստից հետո վերադառնալ նոր նախագծերի:
Երգիչը նաև նշեց, որ վերջին անգամ Հայաստանում է եղել 2008թ.-ին և հասցրել է այցելել Լոռու մարզ, Սյունիք և Արցախ:
Առաջին խումբը, որտեղ հանդես է եկել Սեպուհ Սիմոնյանը, կոչվում էր «Այո», ինչից հետո նա մասնակցել է Unknown Project-ում և AVR-ում:
Capital Cities-ը հինդի-փոփ դուետ է Լոս Անջելեսից, դուետի անդամներն են Ռայան Մերչանթն ու Սեբու (Սեպուհ) Սիմոնյանը: Նրանց դեբյուտը տեղի է ունեցել 2011թ.-ի հունիսի 7-ին, երբ թողարկվել է «Safe And Sound» սինգլը, իսկ որոշ ժամանակ անց՝ 2013թ.-ի սեպտեմբերի վերջին այն թողարկվել է նաև Մեծ Բրիտանիայում: Հաջորդ՝ «Kangaroo Court» սինգլը թողարկվել է 2012թ.-ի մայիսի 1-ին:
Խմբի դեբյուտային ալբոմը («In a Tidal Wave of Mystery») թողարկվել է 2013թ.-ի հունիսի 4-ին:
Սեպուհ Սիմոնյանի հայաստանյան համերգների կազմակերպիչը Deem Communications ընկերությունն է:-0-
