ԵՐԵՎԱՆ, 14 ապրիլի. /Նովոստի–Արմենիա/. Հայտնի ամերիկահայ դաշնակահարուհի Դորա Սերվիարյան–Կյունը ապրիլի 18–ին Երևանում կկատարի Արամ Խաչատրյանի դաշնամուրի կոնցերտը` Հայաստանի պետական ֆիլհարմոնիկ նվագախմբի նվագակցությամբ, երկուշաբթի լրագրողներին ասել է նվագախմբի գեղարվեստական ղեկավար Էդուարդ Թոփչյանը։
«Ես վաղուց եմ ծանոթ Սերվիարյան–Կյունի ստեղծագործությանը, նա Արամ Խաչատրյանի ստեղծագործությունների լավագույն կատարողներից մեկն է։ Նախորդ տարի Լոս Անջելեսում հյուրախաղերի շրջանակներում ես առաջարկեցի նրան գալ Երևան և կատարել Խաչատրյանի կոնցերտը, և այսօր մենք շատ ուրախ ենք, որ պատրաստվում ենք համատեղ ելույթի», – ասել է Թոփչյանը։
Նրա խոսքերով` դաշնակահարուհին ելույթ կունենա Արամ Խաչատրյանի անվան համերգասրահում։ «Նովոստի–Արմենիա» գործակալությունը համերգի տեղեկատվական հովանավորն է։
«Առաջին անգամ Սերվիարյան–Կյունը Երևանում Խաչատրյանի ստեղծագործությունները կատարել է 1996 թ.–ին և այդ ժամանակ էլ համերգ ձայնագրեց Հայաստանի պետական ֆիլհարմոնիկ նվագախմբի նվագակցությամբ` Լորիս Ճգնավորյանի գլխավորությամբ», – ավելացրել է դիրիժորը։
Դաշնակահարուհին իր հերթին նշեց, որ շատ ուրախ է կրկին ելույթ ունենալ պատմական հայրենիքում։
«Երբ 1996 թ.–ին եկա Երևան մութ էր, մարդիկ ծանր դրության մեջ էին, սակայն շատ լավ հիշում եմ, թե ինչպես ինձ ապշեցրեց ժողովրդի համախմբվածությունը։ Նաև հիշում եմ հայկական հացի հրաշալի համը։ Այսօր Երևանը շատ է փոխվել, դարձել ավելի գեղեցիկ և լուսավոր», – ասել է Սերվիարյան–Կյունը։
Նա նշել է, որ իր համար միշտ հետաքրքիր է կատարել Արամ Խաչատրյանի ստեղծագործությունները։
«Խաչատրյանն ինձ կյանք տվեց`որպես երաժիշտ, և ես երբեք չեմ հոգնում նրա ստեղծագործությունները կատարելուց։ Ես ներկայացրել եմ նրա երաժշտությունը աշխարհի տարբեր երկրներում և ամեն կատարման ժամանակ միշտ ինչ–որ նոր բան եմ գտել», – ընդգծել է դաշնակահարուհին։
Դորա Սերվիարյան–Կյունը ծնվել է Բեյրութում։ Հետագա ուսումը շարունակել է Նյու Յորքում։ Իր գործունեության ընթացքում ելույթ է ունեցել մի շարք երկրներում աշխարհի հայտնի նվագախմբերի հետ։
Դաշնամուրի կոնցերտը Խաչատրյանը գրել է 1936 թ.–ին։ Այդ ստեղծագործությունը նշանակալի երևույթ է դարձել երաժշտության պատմության մեջ։–0–
