Հայ դպրոցականներն ուժերը չափել են Շեքսպիրի մասին իրենց գիտելիքներով
ԵՐԵՎԱՆ, 21 մարտի. /Նովոստի–Արմենիա/. Մայրաքաղաքի և մարզերի 7 դպրոցների աշակերտներ մասնակցել են «Իմ Շեքսպիրը» մրցույթին, որի շրջանակներում իրենց ուժերն են չափել մեծանուն դրամատուրգի կյանքի պատմության և ստեղծագործության մասին իրենց գիտելիքներով։
Մրցույթի ժյուրիի անդամներն էին ՀՀ–ում Մեծ Բրիտանիայի արտակարգ և լիազոր դեսպան Քեթրին Լիչը, ԵՊՀ դասախոս, Օքսվորդի համալսարանի շրջանավարտ Անի Կոջոյանը, Երևանի Թումանյանի անվան պետական տիկնիկայի թատրոնի գեղարվեստական ղեկավար Ռուբեն Բաբայանը և ՀՀ–ում Բրիտանական խորհրդի մամուլի քարտուղար Արևիկ Բադալյանը։ Մրցույթն անցկացվեց երկու փուլով, առաջին փուլում դպրոցի աշակերտները պատասխանում էին Շեքսպիրի կենսագրությանն ու ստեղծագործություններին վերաբերող հարցերին, իսկ երկրորդ փուլում նրանք պետք է ներկայացնեին 5 րոպե տևողությամբ բեմադրություն` ներկայացնելով դրամատուրգի ստեղծագործությունները ժամանակակից մշակմամբ։
«Ես ձեզ պես սիրում եմ Շեքսպիրին և շատ հուզված եմ այս մրցույթի կապակցությամբ։ Դուք բոլորդ հիասքանչ եք, և ես համոզված եմ, որ բոլորդ ինձնից շատ բան գիտեք Շեքսպիրի մասին։ Միակ բանը, ինչ ուզում եմ ասել` սիրեք Շեքսպիրին և տարենք այդ սերը ձեր ողջ կյանքի ընթացքում, քանի որ այդ սերը ձեր կյանքն ավելի հարուստ կդարձնի», – ասել է Քեթրին Լիչը։
Մրցույթի հաղթողները ստացան eReader-ներ, իսկ բոլոր մասնակիցները` խրախուսական մրցանակներ։–0–