ԵՐԵՎԱՆ, 15 սեպտեմբերի. /Նովոստի-Արմենիա/. ReAnimania միջազգային փառատոնի մասնակիցներից մեկը հնարավորություն կստանա մեկամսյա աշխատանքային պրակտիկա անցնել Միացյալ Թագավորության Aardman ստուդիայում, հաղորդում է հայկական ներկայացուցչության մամուլի ծառայությունը:
Սա Բրիտանական խորհրդի հայաստանյան գրասենյակի՝ ReAnimania փառատոնի շրջանակում առաջին անգամ սահմանված մրցանակն է:
ReAnimania միջազգային անիմացիոն երրորդ փառատոնը կանցկացվի սեպտեմբերի 14-19-ը Երևանում:
Հաղորդագրության համաձայն, Բրիտանական խորհրդի և ReAnimania երևանյան միջազգային անիմացիոն կինոփառատոնի հետ համագործակցության շրջանակում Հայաստան կժամանի ստուդիայի մասնագետ Մագդալենա Օսինսկան: Նա սեպտեմբերի 14-19-ը կանցկացնի վերապատրաստման դասընթացներ փառատոնի մասնակիցների համար և կքննարկի համագործակցության հեռանկարներ:
«Անիմացիոն արվեստի հայ մասնագետը հնարավորություն կունենա մեկ ամիս շարունակ աշխատել օսկարակիր մասնագետների հետ, ծանոթանալ բրիտանական անիմացիոն արվեստի նորարարություններին և ձեռք բերել նոր հմտություններ ու կապեր»,- նշվում է հաղորդագրության մեջ:
Շուրջ 40 տարվա պատմություն ունեցող Aardman ստուդիայում նկարահանվել են մրցանակակիր բազմաթիվ ֆիլմեր: Aardman ստուդիայի տարբեր տարիների աշխատանքները 7 անգամ առաջադրվել են Օսկար մրցանակի` 4 անգամ արժանանալով հեղինակավոր այդ մրցանակին:
ReAnimania միջազգային անիմացիոն կինոփառատոնն առաջին անգամ անցկացվել է Երևանում 2009թ.-ի հոկտեմբերի 6-ին։ ReAnimania նախագծի նպատակն է օգնել անիմացիոն արվեստի զարգացմանը, համաշխարհային կարգի անիմատոր նկարիչների նոր սերնդի դաստիրակման և համաշխարհային ասպարեզում հայ անիմատորների աշխատանքները ցուցադրելու համար քննարկումներ կազմակերպելը, ինչպես նաև հայ հանդիսատեսին ողջ աշխարհի լավագույն անիմացիոն ֆիլմեր ցուցադրելը։ -0-
