ԵՐԵՎԱՆ, 17 հունիսի. /Նովոստի-Արմենիա/. Facebook սոցիալական կայքի հայ այցելուների նախաձեռնող խումբը մտադիր է նամակ-բողոք ներկայացնել չորեքշաբթի Փարիզում գտնվող ՅՈՒՆԵՍԿՕ-ի կենտրոնակայանում բացված լուսանկարչական ցուցահանդեսի ժամանակ խաչքարերի գտնվելու վայրը ներկայացնող գրառումների բացակայության կապակցությամբ:
«Խաչքարի արվեստ. խաչքարի խորհուրդն ու խաչքարագործությունը» խորագրով լուսանկարչական ցուցահանդեսում ներկայացված են պատմական Հայաստանի տարբեր շրջաններում նկարահանված լավագուն խաչքարերի շուրջ 60 լուսանկարներ, ինչպես նաև քարտեզ, որը ընդգրկում է խաչքարի մշակույթի տարածման շրջաններն ու խաչքարերի արվեստը լուսաբանող գիտական տեղեկություններ:
Հինգշաբթի հայկական մի շարք ԶԼՄ-ներում տեղեկատվություն հայտնվեց այն մասին, որ ցուցահանդեսին առանց որևէ բացատրության անհետացել են խաչքարերի գտնվելու վայրը ներկայացնող ցուցանակները: Այս կապակցությամբ Ֆրանսիայի և Շվեյցարիայի հայկական կազմակերպությունների ներկայացուցիչների շրջանում բողոքի ալիք է բարձրացել:
Ակցիայի կազմակերպիչները կոչ են անում «աշխարհասփյուռ հայությանը բողոքի նամակ հղել ՅՈՒՆԵՍԿՕ-ի էլեկտրոնային հասցեին ([email protected].) այս անազնվության դեմ»:
«Նովոստի-Արմենիա» գործակալությունն այս կապակցությամբ դիմել էր ՀՀ մշակույթի նախարարությանը, որը խոստանում է ավելի ուշ մեկնաբանել այս իրավիճակը:-0-
