Առաջին ազգային կինոմրցանակը կհանձնվի մինչև տարեվերջ
Հայկական առաջին կինոմրցանակաբաշխությունը Հայաստանում կկայանա, հավանաբար, նոյեմբերի վերջին-դեկտեմբերի սկզբին, չորեքշաբթի մամուլի ասուլիսի ընթացքում հայտնեց Հայաստանի Ազգային կինոկենտրոնի տնօրեն Գևորգ Գևորգյանը:
Նրա խոսքով՝ մրցանակի նախնական անվանումն է «Պեպո»:
«Պեպոն» հայկական առաջին ձայնային գեղարվեստական ֆիլմն է, որը նկարահանվել է 1935 թվականին Համո Բեկնազարյանի կողմից «Հայֆիլմ» կինոստուդիայում:
«Մրցանակի անվանումը պետք է հեշտությամբ արտասանվի և հիշվի, սակայն եթե հայտնվեն նոր, ավելի հետաքրքիր գաղափարներ, մենք պատրաստ ենք դրանք դիտարկել»,- հավաստիացրեց Գևորգյանը: Նա ավելացրեց, որ ազգային կինոմրցանակի անվանումը հաստատվում է մեկ անգամ, այդ պատճառով պետք է ընտրել առավել հարմար տարբերակ:
Ըստ նրա, կինոմրցանակաբաշխության նախապատրաստական աշխատանքներն ավարտին են մոտենում, և շուտով ողջ տեղեկությունը կներկայացվի մամուլում:
«Այս փուլում բանակցություններ են տարվում հովանավորների հետ մրցանակային ֆոնդի հարցերի վերաբերյալ, հստակեցվում են մրցանակաբաշխության պայմաններն ու սկզբունքները, ինչպես նաև՝ անվանակարգերը»,- ասաց Գևորգյանը:
Գևորգյանն ավելացրեց, որ մրցանակաբաշխության արարողությունը պետք է անցկացվի բարձր մակարդակով: «Ազգային կինոմրցանակաբաշխության արարողության անցկացման որակից է կախված դրա ողջ հետագա ճակատագիրը»,- ասաց Գևորգյանը: -0-