Մահացել է հայտնի հեռուստահաղորդավար Վիտալի Վուլֆը

Մահացել է «Իմ արծաթե գունդ» հեռուստահաղորդման հաղորդավար, հայտնի արվեստագետ և «Կուլտուրա» ռադիոյի գլխավոր խմբագիր Վիտալի Վուլֆը, հաղորդում է ՌԻԱ Նովոստին՝ հղում անելով «Ռոսիա 24» հեռուստաալիքին:

Ըստ հեռուստատեսության տվյալների, 80-ամյա հաղորդավարը հիվանդանոց էր տեղափոխվել դեռ փետրվարի 15-ին: Մի քանի օր առաջ նրա վիճակը կտրուկ վատացել է, և նրան տեղափոխել են մայրաքաղաքի Բոտկինսկայա հիվանդանոցի վերակենդանացման բաժանմունք:

Մինչև վերջին րոպեները Վուլֆը չի կորցրել գիտակցությունը և պայքարել է հիվանդության դեմ, հաղորդում է հեռուստաալիքը:

Վուլֆը ծնվել է 1930թ.-ի մայիսի 23-ին Բաքվում: Նա ՌԴ արվեստի վաստակավոր գործիչ է, պատմական գիտությունների դոկտոր, «Տեֆի» մրցանակի դափնեկիր: ՌԴ նախագահի հրամանով պարգևատրվել է «Հայրենիքի առջև ունեցած արժանիքների համար» 3-րդ աստիճանի շքանշանով:

Վուլֆը հայտնի է եղել որպես աշխարհի արվեստի, գրողների և քաղաքական գործիչների տաղանդավոր մարդկանց վերաբերյալ հեռուստահաղորդումների հեղինակ:

Ընդհանուր առմամբ Վուլֆն ավելի քան 200 հաղորդում է հեղինակել, որոնց թվում են Չերչիլի, Ռուզվելտի, Դը Գոլի, Օլգա Կնիպեր-Չեխովայի, Անգելինա Ստեպանովայի, Ալեքսանդր Ֆադեևի, Մաքսիմ Գորկու, Մարինա Ցվետաևայի, Օլեգ Եֆրեմովի, Տատյանա Դորոնինայի, Վալենտինա Գաֆտի, Մարիա Միրոնովայի, Նիկոլայ Ցիսկարիձեի և այլոց մասին պատմությունները: -0-