ՀՀ մշակույթի նախարարությունն ու Պատմական հուշարձանները վերականգնող ճարտարապետների հայկական ասոցիացիան կհամագործակցեն մշակութային հուշարձանների վերականգնման ոլորտում

ԵՐԵՎԱՆ, 2 փետրվարի. /Նովոստի-Արմենիա/. ՀՀ մշակույթի նախարար Հասմիկ Պողոսյանը և Պատմական հուշարձանները վերականգնող ճարտարապետների հայկական ասոցիացիայի նախագահ Գագիկ Սողոմոնյանը ստորագրել են Փոխըմբռնման հուշագիր, որով կողմերը արտահայտել են իրենց պատրաստակամությունը համագործակցելու հուշարձանների վերականգնման բնագավառում, երեքշաբթի հաղորդել է գերատեսչության մամուլի ծառայությունը:

Հուշագրով նախատեսվում է ստեղծել հուշարձանների գլխավոր ճարտարապետների ինստիտուտ, իրականացնել հուշարձանների վերականգնման գիտանախագծային, գիտաարտադրական աշխատանքներ, անցկացնել վերականգնման ընթացքում գտնվող հուշարձանների վերականգնման որակի վերահսկողության մոնիթորինգ:

«Կողմերը կիրականացնեն նաև բնագավառի մասնագետների վերապատրաստմանն ու բնագավառի օրենսդրության կատարելագորմանն ուղղված ծրագրեր», - նշվում է տեղեկատվության մեջ:-0-