Երկու հայ երգիչ կմասնակցեն Մոսկվայում տեղի ունեցող Պավել Լիսիցյանի անվ. բարիտոնների միջազգային առաջին մրցույթին

Ալ. Սպենդարյանի անվան օպերայի և բալետի ակադեմիական թատրոնի երկու մեներգիչ մասնակցում են Պավել Լիսիցյանի անվ. բարիտոնների միջազգային առաջին մրցույթին, երկուշաբթի «Նովոստի-Արմենիա» գործակալությանը տեղեկացրեց Հայաստանի մշակույթի նախարարության մամուլի քարտուղար Գայանե Դուրգարյանը։

«Բարիտոնների միջազգային մրցույթին Հայաստանը ներկայացնում են օպերային թատրոնի մեներգիչներ Գևորգ Հակոբյանը և Դավիթ Բաբայանցը», - ասաց Դուրգարյանը։

Նրա խոսքերով, Հայաստանի մշակույթի նախարարությունը ստացել էր մրցույթին մասնակցելու հրավեր և ուղարկել այն բոլոր շահագրգիռ կազմակերպություններին։

«Հայ երգիչները մասնակցում են մրցույթին Մշակույթի նախարարության աջակցությամբ», - տեղեկացրեց նա։

Պավել Լիսիցյանի անվ. բարիտոնների միջազգային առաջին մրցույթի հանդիսավոր բացումը և մասնակիցների վիճակահանությունը տեղի է ունեցել կիրակի՝ Պավել Սլոբոդկինի կենտրոնում։

Վիճակահանության արդյունքներով՝ «առաջին փուլում ելույթ կունենան 12 երկիր ներկայացնող 37 երգիչներ», - տեղեկացրեցին մրցույթի մամուլի կենտրոնից։

Ռուսաստանը, Բելառուսը, Վրաստանը, Ղազախստանը, Ղրղստանը, Հայաստանը, Տաջիկստանը, Ուկրաինան, Չինաստանը, Կորեայի Հանրապետությունը, Հունգարիան և ԱՄՆ-ն ներկայացնող մասնակիցները պայքարելու են 10 հազ. դոլար Գրան-պրիի համար և 2008-09 թթ.-ին Մեծ թատրոնի ներկայացմանը մասնակցելու իրավունքի համար։

ԽՍՀՄ ժողովրդական արտիստ, «ոսկե բարիտոնի» արժանացած Պավել Լիսիցյանին (կյանքից հեռացել է 2004 թ.-ին) նվիրված մրցույթի գաղափարը գրավել է Ռուսաստանի և արտասահմանի բազմաթիվ երաժիշտների ուշադրությունը։ Ի սկզբանե մրցույթի կազմկոմիտե է (նախագահն է ՌԴ նախագահի մշակույթի խորհրդական Յուրի Լապտևը) ներկայացվել 75 հայտ՝ 15 երկրից։

 Կազմակերպիչների կարծիքով, մրցույթի յուրահատկությունն է դարձել «մասնակիցների համար տարիքային բարձր շեմի բացակայությունը»՝ 21 տարեկանից և բարձր։

Մրցույթի միջազգային ժյուրին գլխավորում է աշխարհի լավագույն բարիտոններից մեկը, Ռուսաստանի ժողովրդական արտիստ, «Քովենթ Գարդեն» և «Մետրոպոլիտն Օպերա» թատրոնների մեներգիչ Սերգեյ Լեյֆերկուսը, իսկ նրա տեղակալն է հայտնի երգչի դուստրը՝ Կարիան Լիսիցյանը։

Երաժիշտների միջազգային միության նախագահ, ԽՍՀՄ ժողովրդական արտիստ Իրինա Արխիպովան դարձել է բարիտոնների մրցույթի նախագահը։

Մրցույթի առաջին և երկրորդ փուլերի լսումները տեղի կունենան փետրվարի 4-ին և 5-ին՝ Պավել Սլոբոդկինի թատերահամերգային կենտրոնում, իսկ եզրափակիչ փուլը և մրցանակակիրները Գալա-համերգը տեղի կունենա փետրվարի 7-ին՝ Ռուսաստանի պետական ակադեմիական մեծ թատրոնում։ --0-