ԵՐԵՎԱՆ, 14 նոյեմբերի./Նովոստի-Արմենիա/. Հայաստանի ազգային գրադարանի դրոշի շնորհանդեսը տեղի ունեցավ չորեքշաբթի Երևանում՝ ՀԱԳ-ի 175-ամյա հոբելյանի հանդիսությունների շրջանակում։
Ինչպես շնորհանդեսի ժամանակ հայտարարեց ՀԱԳ-ի տնօրեն Դավիթ Սարգսյանը, սա առաջին անգամն է, որ գրադարանը ձեռք է բերում պաշտոնական խորհրդանիշ, որն արտացոլում է նրա էությունը և սոցիալական նշանակությունը։
Դրոշն իրենից ներկայացնում է նարնջագույն ուղղանկյուն կտոր՝ գլոբուսի և բացված գրքի պատկերով, որի էջերի վրա տեղադրված է ՀԱԳ հապավումը՝ երանգավորված հայկական եռագույնով։ Դրոշի էսքիզը հաստատվել էր ՀԱԳ-ի կոլեգիալ խորհրդի ժամանակ։
«Նարնջագույնը խորհրդանշում է Հայաստանը և ժողովրդին, իսկ գիրքը՝ դա մշակույթի այն մասն է, որն առանց նախապաշարմունքների միավորում է ազգերին և պետություններին»,- նշեց Սարգսյանը։
«ՀԱԳ-ը անցյալի մշակութային արժեքների պահպանողն է, և միաժամանակ, նրա գործունեությունը նպատակամղված է դեպի ապագան»,- ավելացրեց նա։
2007թ. նոյեմբերի 1-ին Հայաստանի ազգային գրադարանը ներկայացրեց իր հիմնը, որի բառերը գրել է հենց Դավիթ Սարգսյանը, երաժշտության հեղինակն է ՀԱԳ-ի երաժշտական բաժնի վարիչ Լուսինե Գրիգորյանը։
Հայաստանի ազգային գրադարանը հիմնվել է 1832թ.։ 1919թ. հուլիսի 4-ին Հայաստանի մինիստրների խորհուրդը որոշում ընդունեց Ազգային գրադարանին պետական հաստատության կարգավիճակ շնորհելու մասին։ ՀԱԳ-ի ֆոնդերում պահպանվում է ավելի քան 6 մլն. գիրք։--0—
