Հայաստանում նշել են մեծ հայ գեղանկարիչ Գևորգ Բաշինջաղյանի 150-ամյակը
ԵՐԵՎԱՆ, 9 նոյեմբերի./Նովոստի-Արմենիա/. Հայաստանի ազգային պատկերասրահում ուրբաթ բացվեց մեծ հայ գեղանկարիչ Գևորգ Բաշինջաղյանի ստեղծագործությունների ցուցադրությունը, որը նվիրված է նրա 150-ամյա հոբելյանին։
«Բնապատկերի ժանրը հնարավոր չէ պատկերացնել առանց Բաշինջաղյանի։ Հենց նա է հայկական բնանկարչության հիմնադիրներից մեկը»,-ցուցահանդեսի բացմանը ելույթ ունենալով հայտարարեց, արվեստաբան, Հայաստասնի ազգային պատկերասրահի հայկական գեղանկարչության բաժնի ղեկավար Արմեն Գասպարյանը։
Նրա խոսքերով, ցուցադրության մեջ են մտել նկարչի 70 աշխատանքներ։ Ցուցասրահում հավաքված են ինչպես Ազգային պատկերասրահում պահվող Բաշինջաղյանի կտավները, այնպես էլ Եղիշե Չարենցի անվան գրականության թանգարանի, Հովհաննես Թումանյանի տուն-թանգարանի ցուցանմուշները, անհատական հավաքածուներից։
Նա հավելեց, որ նկարչի 150-ամյակի կապակցությամբ հրատարակվել է նրա աշխատանքների ժողովածուն, ինչպես նաև օրացույց՝ Բաշինջաղյանի քիչ հայտնի նկարներով։--0--
