Շաբաթ՝ Երևանում մեկնարկել են Եվրոպական ժառանգության օրերը, որոնք ազդարարվել են երիտասարդ լուսանկարիչների ցուցահանդեսի բացմամբ։
Ինչպես լուսանկարների ցուցահանդեսին տեղեկացրեց Հայաստանի մշակույթի նախարար Հասմիկ Պողոսյանը, Հայաստանի հետ զուգահեռ, Եվրոպական ժառանգության օրերի շրջանակներում, միջոցառումներ են անցկացվում մի շարք երկրներում, այդ թվում նաև Իտալիայում, Հունաստանում, Բուլղարիայում։
«Պատմական յուրաքանչյուր հատվածում ժողովրդի ժառանգությունը մեծ նշանակություն ունի ապագա սերունդների համար։ Մենք ուզում ենք հիշեցնել, որ Եվրոպան դա ոչ միայն տնտեսական և քաղաքական հասկացություն է։ Եվրոպայի գլխավոր ռեսուրսը մնում է մշակույթը», - ասաց նա։
Ցուցահանդեսին ներկայացված են Շոտլանդիայի, Ավստրիայի, Բելգիայի, Լիտվայի, Բուլղարիայի, Իսպանիայի, Իտալիայի, Դանիայի մինչև 21 տարեկան երիտասարդ լուսանկարիչների ավելի քան 150 աշխատանքներ։
Ցուցահանդեսին Հայաստանը ներկայացնում են Ռուս-հայկական (Սլավոնական) համալսարանի (ՌՀՀ) վեց ուսանողների աշխատանքները, որոնք հաղթանակ են տարել «Արձանների լուսանկարման միջազգային փորձը» միջազգային 12-րդ մրցույթի ժամանակ։
Եվրոպական ժառանգության օրերի շրջանակներում ծրագրված է նաև «Երկու օր Սյունիքում. Սյունիքի պատմամշակութային ժառանգությունը ՌՀՀ-ի ուսանողների աչքերով» ցուցահանդեսի բացումը։
Անցկացվելու են նաև «Եվրոպական գրականությունը հայերենով», «Ծխախոտի փայտե տուփերը. նորարարություններ և ավանդույթներ», «Հագուստ, գործվածք և ասեղնագործություն. Ուրարտուից մինչ օրերս», «Հնագույն մարդը Հայաստանում և աշխատանքի գործիքները», «Խոսող քարերը» ցուցահանդեսները։
Ծրագրված է նաև այցելություն Սաղմոսավանք։
2007 թ.-ին Եվրոպական ժառանգության օրերի շրջանակում անցակցվող միջոցառումներին մասնակցում են Եվրոխորհրդի 47 անդամ-երկրներ և նրա կազմը չմտնող երկու երկրներ՝ Բելորուսն ու Վատիկանը։ 2006 թ.-ին 20 միլիոն Եվրոպացիների համար իրենց դռներն էին բացել Եվրոպական երկրների 30 հազ. թանգարաններ։
Եվրոպական ժառանգության օրերը անց են կացվում 1991 թ.-ից։
Արդեն երրորդ տարին է ինչ Հայաստանը մասնակցում է միջոցառումներին։ Եվրոպական ժառանգության օրերը Հայաստանում կշարունակվեն մինչև սեպտեմբերի 30-ը։-0-
