Հայ բանաստեղծուհի Մարինե Ալեսի ձայնասկավառակի շնորհանդեսը տեղի կունենա Երևանում

Երևանում սեպտեմբերի 22-ին տեղի կունենա հայ բանաստեղծուհի-երգահան Մարինե Ալեսի (Վարդանյան-Համբարձումյան) չորրորդ ձայնասկավառակի շնորհանդեսը, որը կոչվում է «Քո կողքին և առանց քեզ»։ Այս մասին երեքշաբթի լրագրողներին Երևանում հայտնեց բանաստեղծուհու պրոդյուսեր Արմեն Մանուկյանը։

Նրա խոսքերով, սկավառակում ընդգրկվել են հայ էստրադային երգիչների կատարմամբ 14 նոր ստեղծագործություններ։

«Նոր CD-ի ձայնագրման գաղափարը, որի մեջ ներգրավված կլինեն միայն տղամարդ կատարողներ, ծնվեց դեռևս մեկ ու կես տարի առաջ»,-պարզաբանեց նա։

Մանուկյանը հավելեց, որ ունկնդիրների դատին են ներկայացվում հեղինակի նոր երգեր այնպիսի հայտնի երգիչների կատարմամբ, ինչպիսիք են Ֆորշը, Արսեն Սաֆարյանը, Արամոն, Մայքլ Քոթանջյանը։

Պրոդյուսերը հավելեց, որ որոշ երգեր կատարել են դերասաններ, որոնց թվում են Աշոտ Ղազարյանը, Վիգեն Ստեփանյանը, Միքայել Պողոսյանը։ Մանուկյանը հայտնեց, որ նոր երգերի հիման վրա արդեն պատրաստվում են երկու տեսահոլովակներ։

Իր հերթին Մարինե Ալեսը հավելեց, որ իր նոր ձայնասկավառակի համար երգերը գրվել են երկու տարվա ընթացքում։

«Իմ երգերում ես փորձում եմ փոխանցել այն զգացմունքները, որոնք կուզենար վերապրել կանանցից յուրաքանչյուրը և այն խոսքերը, որոնք ուզում ենք լսել մեր սիրելիներից»,-ընգծեց նա։

Մարինե Ալեսն ավարտել է Ռոմանոս Մելիքյանի անվան երաժշտական ուսումնարանը, ապա Թատրոնի և կինոյի պետական համալսարանը։ Ալեսը այնպիսի հայտնի երգերի հեղինակ է, ինչպիսիք են «Պատրանքի թևերին» և «Քարե անձրևը», որոնք հնչում են հայտնի էստրադային երգչուհի Շուշան Պետրոսյանի կատարմամբ։--0—