Ոսկրածուծի առաջին փոխպատվաստումն է իրականացվել Հայաստանում

ԵՐԵՎԱՆ, 9 ապրիլի. /Նովոստի-Արմենիա/. Առաջին անգամ Հայաստանում իրականացվել է ոսկրածուծի՝ արյունաստեղծ ցողունային բջիջների երկու փոխպատվաստում, հայտնում է Առողջապահության նախարարության մամուլի ծառայությունը:

Փոխպատվաստումն իրականացվել է Համբուրգի Էպենդորֆ կլինիկայի փոխպատվաստման բաժնի ղեկավար, պրոֆեսոր Նիկոլայուս Կրյոգերի ղեկավարությամբ: Նրա խոսքով, սա ամբողջ աշխարհում իրականացվող նորարարական մեթոդ է:

Հիվանդներից մեկը Արցախից է, մյուսը՝ Հայաստանից:

«Այդ երկու անձը միելոմային հիվանդներ են, քիմիաթերապիայի բազմաթիվ կուրսերից հետո հիվանդների մոտ ստացանք համապատասխան ռեմիսիա, և հիվանդությունը կրկնվեց: Այդ հիվանդների մոտ ցուցված է ցողունային բջիջների փոխպատվաստումը»,- ասել է Յոլյանի անվան «Արյունաբանական կենտրոն» ՓԲԸ-ի տնօրեն, տրանսպլանտոլոգների թիմի ղեկավար Սմբատ Դաղբաշյանը:

«50-ամյա Էլմիրան մինչ փոխպատվաստումը բժշկի հետ խոսելիս ասել է, թե ուզում է այն ժամանակաշրջանում, որ պետք է ապրի, լինել առողջ և զգալ կյանքն այնպես, ինչպես կա: Եվ ապրել ընտանիքի հետ: Հիվանդը կյանքի որակի բարձրացման խնդիր դրեց»,- հավելել է Սմբատ Դաղբաշյանը:

Հայաստանում փոխպատվաստման կարիք ունի տարեկան 60 հիվանդ: Փոխպատվաստումն իրականացվում է մի քանի փուլով: Դրանում ներառված է քիմիաթերապիայի նախապատրաստական անցկացումը, ոսկրածուծի ստիմուլյացիան, ցողունային բջիջների հավաքագրումը, դրանց մշակումը, սառեցումը, հիվանդների դեղորայքային նախապատրաստումը և ցողունային բջիջների փոխպատվաստման բուն գործընթացը: -0-