ԵՐԵՎԱՆ, 17 հուլիսի./Նովոստի–Արմենիա/. Սևանա լճի ջուրն այսօրվա դրությամբ անվտանգ է լողալու, բայց ոչ խմելու համար, չորեքշաբթի ասաց Հայաստանի առողջապահության նախարարության Հիվանդությունների վերահսկողության և կանխարգելման կենտրոնի գլխավոր տնօրենի տեղակալ Նունե Բակունցն Ազգային ժողովում «Սևանա լճի խդնիրները» թեմայով լսումների ժամանակ։
Հուլիսի սկզբից Սևանա լճի որոշ ափերում դիտվել է ցիանոբակտերների կամ կապտականաչ ջրիմուռների կուտակում, ինչը հանգեցրել է ջրի կանաչելուն։ Այդ ջրիմուռները տոքսիններ են արտադրում, որոնք բացասական ազդեցություն են գործում կենդանիների և մարդու առողջության վրա, եթե մարդիկ խմեն «ծաղկած» ջուր կամ անզգուշությամբ այն կուլ տան։
Այդ կապակցությամբ Հայաստանի առողջապահության նախարարությունը կոչ է արել քաղաքացիներին խուսափել լողալուց Սևանի այն հատվածներում, որտեղ կան կապտականաչ ջրիմուռների կուտակումներ։
«Նախարարությունը կանոնավոր կերպով կատարում է ջրի լաբորատոր զննում և գրանցում է դրա կազմության ամենաաննշան փոփոխությունները` մարդկանց անվտանգությունն ապահովելու համար։ Մենք օպերատիվ կերպով կիրազեկենք ցանկացած ռիսկի առկայության դեպքում»,– ասաց Բակունցը, նշելով, որ կատարվում է նաև լճում լողացող մարդկանց մոնիթորինգ։
Միաժամանակ փորձագետը կոչ արեց ֆլեշմոբեր չանցկացնել կամ չքարոզել լճից ջուր խմելը։
«Միանշանակ, լճի ջուրը շատ ավելի մաքուր է, քան այլ բնական ավազաններում, բայց այն իր որակով խմելու չէ։ Հնարավոր է, որ մեկ–երկու տեղացիներ մշտապես խմում են այդ ջուրը, և նրանց օրգանիզմն արդեն ադապտացվել է, կամ նրանք արդեն կոփված են և իմունիտետ են ձեռք բերել։ Բայց խնդրում եմ` կոչ մի արեք նույնն անել ուրիշներին։ Չէ՞ որ դա կարող են փորձել անպատրաստ մարդիկ, օրինակ, զբոսաշրջիկները, ովքեր կարող են թունավորվել»,– ասաց նա։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում