ԵՐԵՎԱՆ, 18 օգոստոսի. /Նովոստի–Արմենիա/. Հայաստանի վարչապետ Նիկոլ Փաշինյանն ուրբաթ հանրահավաքում ասաց, որ երկրում հաղթահարվել է արտագաղթի առաջին փուլը:
«Իշխանափոխությունից հետո Հայաստան ժամանածների թիվը գերազանցել է երկրից մեկնածներինը: Պաշտոնական տվյալներով, մայիսի 10-ից օգոստոսի 14-ն ընկած ժամանակահատվածում Հայաստան ժամանածների թիվը 29986-ով ավելի է եղել, քան մեկնածներինը: Նախորդ տարվա նույն ժամանակահատվածում Հայաստանից մեկնածների թիվը եկածների թիվը գերազանցում էր 6000-ով: Այս ցուցանիշները կարելի է համարել արտագաղթի հաղթահարման ամենաառաջին և ամենակարևոր փուլը»,- ասաց նա:
Փաշինյանի խոսքով, 3 ամսվա ընթացքում Հայաստան է ժամանել 34 հազարով ավելի օտարերկյա քաղաքացի, քան նախորդ տարվա նույն ժամանակահատվածում:
«Ըստ էության, դա նշանակում է ներդրումային և զբոսաշրջային հետաքրքրվածության աճ»,- ընդգծեց նա:
Վարչապետը նշեց, որ Հայաստան ժամանածների թվում շատ են հայերը:
«Այն փաստը, որ Երևանում և Հայաստանի մյուս մարզերում անշարժ գույքի գներն աճել են 20 տոկոսով, վկայում է, որ նրանք վերադառնում են հայրենիք ոչ թե պարզապես որպես զբոսաշրջիկ, այլ նաև անշարժ գույք են գնում հայրենիքում ապրելու համար»,- ասաց նա: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում