Վանաձոր-Ալավերդի- Վրաստանի սահման ավտոճանապարհի մի հատվածը փակ կլինի սեպտեմբերի 14-ից

ԵՐԵՎԱՆ, 13 սեպտեմբերի. /Նովոստի-Արմենիա/. Վանաձոր - Ալավերդի - Վրաստանի սահման միջպետական ավտոճանապարհի Վանաձոր-Թումանյան հատվածով երթևեկությունը ժամանակավորապես կդադարեցվի, հայտնում է ՀՀ ԱԻՆ մամուլի ծառայությունը։

Ըստ հաղորդման, ճանապարհի կփակվի սեպտեմբերի 14–ից, ժամը 08։00–ից հիմնանորոգման աշխատանքների կապակցությամբ տրանսպորտային բոլոր միջոցների համար:

ՀՀ տրանսպորտի և կապի նախարարության կողմից սահմանվել են տրանսպորտային երթևեկության հետևյալ այլընտրանքային երթուղիները.

1. Տարանցիկ բեռնատար ավտոմոբիլների և երթուղային ավտոբուսների համար՝

ա) Երևան - Սևան - Իջևան (Մ-4) , Ոսկեպար - Նոյեմբերյան - Բագրատաշեն - Վրաստանի սահման (Մ-16) ճանապարհահատվածներով:
բ) Երևան - Սպիտակ - Վանաձոր (Մ3) – Դիլիջան-Իջևան (Մ-4) – Ոսկեպար – Նոյեմբերյան – Բագրատաշեն (16) ճանապարհահատվածներով։

2. Տրանսպորտային միջոցների ներհամայնքային երթևեկությունը դեպի Ալավերդի, Վանաձոր քաղաքներ և մոտակա բնակավայրեր կիրականացվի հետևյալ երթուղիներով.

ա) Վանաձոր - Ստեփանավան - Ագարակ - Կողես - Այգեհատ - Օձուն - Ալավերդի – Վրաստանի սահման,
բ) Վանաձոր - Դսեղ - Մարց - Թումանյան ճանապարհահատվածներով։

Նախարարությունից նշում են, որ Հայաստանից Վրաստան ուղևորվող մարդատար և միջին բեռնատար մեքենաների վարորդները կարող են օգտվել նաև Երևան - Գյումրի - Աշոցք - Բավրա - Վրաստանի սահման ճանապարհահատվածից։ -0-