ԵՐԵՎԱՆ, 25 նոյեմբերի. /Նովոստի–Արմենիա/. Թուրքական ՌՕՈՒ կողմից ռուսական Սու-24–ի ոչնչացումը չափազանց ռիսկային և վտանգավոր քայլ էր Անկարայի կողմից, չորեքշաբթի լրագրողներին ասաց թուրքագետ Լևոն Հովսեփյանը։
«Ռուսական ինքնաթիռի հետ կապված միջադեպն աննախադեպ էր։ Դա բավականին վտանգավոր քայլ էր Թուրքիայի կողմից` սեփական վճռականությունը ցույց տալու համար։ Չի բացառվում, որ ինքնաթիռի ոչնչացման մասին որոշումը չի ընդունվել համապետական մակարդակով, այլ Էրդողանի հավակնությունների հետևանք է»,– նշեց Հովսեփյանը։
Նա միաժամանակ կարծում է, որ անհրաժեշտ է հաշվի առնել թուրքական իշխանությունների վարքագիծը, որը ժամանակի հետ ավելի ագրեսիվ է դառնում։
«Փորձագետներն ավելի վաղ խոսել են այն մասին, որ նոյեմբերի 1–ին Թուրքիայում անցկացված խորհրդարանական ընտրություններից հետո քաղաքական և տարածաշրջանային առումով մենք կտեսնենք ավելի ագրեսիվ և անկանխատեսելի հարևանի»,– ավելացրեց Հովսեփյանը։
Նա հիշեցրեց նաև, որ վերջին տարիներին ռուս–թուրքական հարաբերությունները բարձրացել էին աննախադեպ մակարդակի, ինչը, մասնավորապես, պայմանավորված էր էներգետիկ, տնտեսական ոլորտների գործակցությամբ և ազդեցություն է գործել երկկողմ կապերի վրա։
«Հենց այդ պատճառով կողմերը փորձում էին աչք փակել աշխարհաքաղաքական և ռազմաքաղաքական տարաձայնություններին։ Այնուամենայնիվ, Սիրիայի դեպքում դա անել չհաջողվեց»,– ընդգծեց Հովսեփյանը։
«Կարծում եմ, որ լարվածությունը որոշ ժամանակ կպահպանվի, այնուամենայնիվ, չեմ կարծում, թե դա կհանգեցնի երկու երկրների ռազմական բախման»,– ավելացրեց փորձագետը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
