Պուտին. «Նախագահ» ֆիլմի նպատակն է ներկայացնել Ռուսաստանի անցած ուղին, պետք չէ հաճախ նման ֆիլմեր ցուցադրել

ԵՐԵՎԱՆ, 28 ապրիլի. /Նովոստի–Արմենիա/. «Ռոսիա» հեռուստաալիքով ցուցադրվող «Նախագահ» ֆիլմի նպատակն էր ոչ թե պարծենալ նվաճումներով, այլ ներկայացնել երկրի անցած ուղին, պետք չէ հաճախ նման ֆիլմեր ցուցադրել, հայտարարել է ՌԴ նախագահ Վլադիմիր Պուտինը։

«Ես չեմ մասնակցել ֆիլմի աշխատանքներին, վերջում տվել եմ այս հարցազրույցը։ Համաձայնվել եմ, որպեսզի այս ֆիլմը նկարահանվի, էկրան բարձրանա ոչ թե պարծենալու համար նրանով, ինչ կատարվել է, այն նկարահանվել է ցույց տալու համար, թե ինչ ուղի է անցել երկիրը նախորդ տարիներին», – ասել է Պուտինը Համառուսական ժողովրդական ճակատի մեդիաֆորումի ժամանակ, հաղորդում է «ՌԻԱ Նովոստին»։

Նրա խոսքերով` շատ կարևոր է, որպեսզի բոլորը` և շարքային քաղաքացիները, և նրանք, ովքեր զբաղեցնում են ղեկավար պաշտոններ, հասկանան տեղի ունեցող իրադարձությունների դինամիկան և ելնելով դրանից` կարողանան ապագայի պլաններ կառուցել։ Նա նաև նշել է, որ ֆիլմում որոշ պահեր կարելի էր այլ կերպ ներկայացնել։

«Կարծում եմ, որ պետք չէ նման ֆիլմեր հաճախակի նկարահանել», – ասել է նախագահը` պատասխանելով այն հարցին, թե երբ դուրս կգա ֆիլմի երկրորդ մասը։ –0–