ԵՐԵՎԱՆ, 25 ապրիլի. /Նովոստի–Արմենիա/. Ռուսական ռազմական տեխնիկայի արտահանողական պատվերների ընդհանուր ծավալը 2013 թվականին հասել է ռեկորդային 49 միլիարդ դոլարի, հայտնել է ՌԴ նախագահ Վլադիմիր Պուտինը։
«Ռազմական տեխնիկայի մեր մշակողներն ու արտադրողները մասնակցել են 24 միջազգային ցուցահանդեսների, ստորագրել են 18 միլիարդ դոլարի նոր երկարաժամկետ պայմանագրեր»,– ասել է Պուտինը, հաղորդում է ՌԻԱ Նովոստին։
Արդյունքում, ըստ նրա, արտահանման պատվերների համախառն պորտֆելը «հասել է ռեկորդային ցուցանիշի և գերազանցել է 49 միլիարդ դոլարը»։
ՄԱՏԱԿԱՐԱՐՈՒՄՆԵՐԻ ԱՇԽԱՐՀԱԳՐՈՒԹՅՈՒՆԸ
Ռուսական արտադրանքը մատակարարվել է 65 երկիր, միաժամանակ 89 երկրի հետ ստորագրված են և իրականացվում են ռազմատեխնիկական համագործակցության ծրագրեր։
«Դինամիկ զարգացել են ռազմատեխնիկական կապերն ավանդական գործընկերների հետ։ Դրանք ԱՊՀ երկրներն են, ՀԱՊԿ երկրները, Հնդկաստանը, Վենեսուելան, Ալժիրը, Չինաստանի Ժողովրդական Հանրապետությունը, Վիետնամը։ Յուրացվել են նաև սպառազինության նոր շուկաներ, նախևառաջ, Լատինական Ամերիկայում»,– ավելացրել է նախագահը։
Նա նշել է, որ Ռուսաստանը գլոբալ շուկայի առաջատարներից մեկն է և ամուր պահում է երկրորդ տեղը սպառազինության մատակարարումների ծավալներով։
«Հիշեցնեմ, ԱՄՆ–ն շուկայի 29 տոկոսն է, Ռուսաստանը` 27 տոկոսը, Գերմանիան` 7 տոկոսը, Չինաստանը` 6 տոկոսը Ֆրանսիան` 5 տոկոսը։ Նախորդ տարի ռուսական ապրանքների և ծառայությունների արտահանումը ՌՏՀ մասով աճել է 3 տոկոսով և գերազանցել է 15.7 միլիարդ դոլարը։ Դա մի փոքր շատ է, քան 2012 թվականին»,– ասել է ռուս առաջնորդը։
Նա հիշեցրել է, որ ընդլայնվել են ռազմատեխնիկական համակարգի մասնակիցների լիազորությունները` «Արտադրողները հնարավորություն են ստացել ինքնուրույն իրականացնել արտադրանքի արդիականացում, որոշել գիտական հետազոտությունների ուղղությունները, ստեղծել համատեղ ձեռնարկություններ օտարերկրացի գործընկերների հետ։ Միաժամանակ, բարձրացվել է ղեկավարների անհատական պատասխանատվությունն ընդունվող որոշումների համար»։
Պուտինը շնորհակալություն է հայտնել պաշտպանական արդյունաբերության մասնագետներին` ապահովված արդյունքների համար։
«Իրենց աշխատանքով նրանք ևս մեկ անգամ հաստատեցին, որ Ռուսաստանն ի զորու է նախագծել և արտադրել ամենաբարդ և ամենաժամանակակից ռազմական տեխնիկա, հաջողությամբ մրցել սպառազինության համաշխարհային շուկաներում Կարևոր է չսահմանափակվել եղածով, ավելի ակտիվ թարմացնել արդյունաբերական բազան, առաջատար տեխնոլոգիաներ ներդնել, ընդլայնել գիտահետազոտական և փորձակոնստրուկտորական աշխատանքների թեմատիկան»,– ասել է Պուտինը։ -0-Ն.Ա.
