Մեծ թատրոնը հունվարի կեսին կլուծի Ցիսկարիձեի հետ կնքած ռեպետիտորական աշխատանքի մասին պայմանագիրը

ԵՐԵՎԱՆ, 10 հունվարի. /Նովոստի-Արմենիա/. Մեծ թատրոնը մտադիր է հունվարին լուծել ՌԴ ժողովրդական արտիստ, թատրոնի բալետի մենակատար Նիկոլայ Ցիսկարիձեի հետ կնքած ռեպետիտորական աշխատանքի մասին պայմանագիրը, «ՌԻԱ Նովոստիին» տեղեկացրել են Մեծ թատրոնի ղեկավարությունից:

Հունվարի սկզբին Ցիսկարիձեն տեղեկացրել է, որ դեկտեմբերի 15-ին ինքը ծանուցում է ստացել այն մասին, որ ռեպետիտորական աշխատանքի մասին պայմանագիրը կարող է լուծվել, քանի որ ինքն աշխատում է կես դրույքով, իսկ թատրոնը ցանկանում է ռեպետիտոր ընդունել ամբողջ դրույքով: Ցիսկարիձեն տարակուսանք է հայտնել այն պատճառով, որ ամբողջ դրույքով աշխատանք իրեն չեն առաջարկել: Նա մտադիր է դիմել դատարան, եթե պայմանագրի լուծման մասին տեղեկությունները հաստատվեն:

«Հունվարի կեսին կլուծվի հայտնի պարող, Մեծ թատրոնի առաջատար մենակատար Ցիսկարիձեի հետ կնքված բալետի ռեպետիտորի կես դրույքով աշխատանքի պայմանագիրը՝ ներքին համատեղության պայմաններով», - ասել են թատրոնի ղեկավարությունից:

Գործակալության զրուցակցի խոսքերով՝ նման որոշում է ընդունվել, քանի որ թատրոնին ամբողջ դրույքով ռեպետիտոր է անհրաժեշտ գլխավոր բեմում բալետախմբի հետ աշխատանքի համար:

«Այդ պաշտոնը կզբաղեցնի Ռեգինա Նիկիֆորովան, ով կաշխատի ամբողջ դրույքով Նիկոլայ Ցիսկարիձեի և Յան Գոդովսկու կես դրույքների հաշվին», - տեղեկացրել է նա:

«Ինչ վերաբերում է Նիկոլայ Ցիսկարիձեի՝ որպես բալետի արտիստ, բեմի առաջատար վարպետի աշխատանքին, ապա այստեղ որևէ փոփոխություն չկա, նա կշարունակի աշխատել Մեծ թատրոնում», - ասել է Մեծ թատրոնի ղեկավարության ներկայացուցիչը:-0-