«Եդինայա Ռոսիայի» անդամները կընդլայնեն իրենց խմբակցության նախագահությունը Պետդումայում

«Եդինայա Ռոսիա» կուսակցության անդամները ծրագրում են կրճատել Դումայի իրենց խմբակցության աշխատակազմը 10 տոկոսով՝ 60-62 մարդով, ինչպես նաև էապես ընլայնել խմբակցության նախագահությունը՝ 17-ից մինչև 51 մարդ, լրագրողներին ասել է խմբակցության ղեկավար Անդրեյ Վորոբյովը:

«Մենք կուղղենք առաջարկը, որպեսզի լրացուցիչ կրճատենք «Եդինայա Ռոսիայի» խմբակցության աշխատակազմը 10 տոկոսով»,- երկուշաբթի ասել է Վորոբյովը լրագրողներին, հաղորդում է ՌԻԱ Նովոստին:

Ըստ նրա՝ խմբակցության աշխատակազմը պետք է բաղկացած լիներ 73 մարդուց: Վորոբյովը հիշեցրել է, որ ի սկզբանե խմբակցության աշխատակազմը որոշված է եղել կրճատել 5 տոկոսով՝ մինչև 69 մարդ, սակայն այնուհետև կուսակցության անդամները որոշել են հավելյալ ավելի լուրջ կրճատում կատարել: Վորոբյովը համոզմունք է հայտնել, որ այդ առաջարկը հավանության կարժանանա խմբակցության առաջիկա նիստում:

Ըստ նրա՝ ԵՌ-ն կընդլայնի խմբակցության նախագահության կազմը, որպեսզի առավելագույն թվով պատգամավորներ կարողանան մասնակցել հարցերի քննարկման նախնական փուլին: Նա նշեց, որ խմբակցության նախագահությունում կընդգրկվեն խմբակցության ամենաակտիվ անդամները:

Վորոբյովի խոսքով՝ մասնավորապես, խմբակցության նախագահությունում, բացի փոխխոսնակներից և կոմիտեների ղեկավարներից, կընդգրկվեն այն կոմիտեների փոխնախագահները, որոնց նախագահներն ընդդիմադիր կուսակցությունների ներկայացուցիչներ են:

Վորոբյովը նշեց, որ ղեկավար պաշտոնների տեղաբաշխման ժամանակ Պետդումայում 15 կոմիտեներ գլխավորեցին եդինոռոսները, իսկ 14-ը՝ ընդդիմության ներկայացուցիչները: Վորոբյովը հիշեցրել է, որ յուրաքանչյուր կոմիտեում կլինի ղեկավարի երկուական տեղակալ, ընդ որում՝ մեկը եդինոռոս կլինի, իսկ երկրորդը՝ ընդդիմադիր: Բացի այդ, կոմիտեներում կլիեն ղեկավարի 87 «սովորական» տեղակալներ, 43-ը նրանցից կլինեն ԵՌ-ից, իսկ 44-ը՝ ընդդիմադիր կուսակցություններից:

«Եդինայա Ռոսիան» ունի 238 մանդատ: -0-