Ռուսաստանն ու Եվրամիությունն ակտիվացրել են վիզային ռեժիմի պարզեցման համատեղ աշխատանքը դրա ամբողջական վերացման հեռանկարով, հինգշաբթի Դաշնային ժողովին հղած ուղերձում հայտնել է ՌԴ նախագահ Դմիտրի Մեդվեդևը, հաղորդում է ՌԻԱ Նովոստին:
«Եվրամիության անդամ պետությունների հետ արդեն ստորագրվել է գործընկերության 23 պայմանագիր արդիականացման նպատակով: Դրանք նախատեսում են տասնյակ կոնկրետ նախագծեր»,- ասել է ռուսական պետության առաջնորդը:
ՌԴ և Եվրոպայի միջև վիզային ռեժիմի վերացման առաջին քայլն արվել է դեկտեմբերի 15-ին Բրյուսելում՝ Ռուսաստան-ԵՄ գագաթնաժողովի ընթացքում, երբ կողմերը հավանություն են տվել այդ խնդրի լուծման ուղղությամբ համատեղ քայլերի անվանացանկին: Ինքը փաստաթուղթը կոչվում է «Ռուսաստանի քաղաքացիների կարճաժամկետ ուղևորությունների ելքի արտոնագրերի վերացման համատեղ քայլեր»: Սակայն, թե երբ դա իրականում կիրականացվի, դեռևս պարզ չէ:
Ստորագրում կամ վավերացում չպահանջող այդ փաստաթուղթը հաստատվել է ԵՄ նախարարների խորհրդի կողմից և ընդգրկում է ինչպես Եվրոպայի, այնպես էլ Ռուսաստանի գործողությունների ցանկը կարճաժամկետ ուղևորությունների ժամանակ ելքի արտոնագրերի ռեժիմի վերացման ուղղությամբ:
Գործողությունները վերաբերում են փաստաթղթերի անվտանգությանը, օրինակ, կենսաչափական անձնագրերի ներդրմանը, անօրինական ներգաղթի դեմ պայքարին և սահմանների կառավարմանը, իրավապահ բնագավառում անվտանգությանն ու համագործակցությանը, այդ թվում՝ անդրազգային կազմակերպված հանցավորության, ահաբեկչության և կոռուպցիայի դեմ պայքարի ոլորտում:
Դիվանագետները պարզաբանում են, որ փաստաթղթի կատարումից և ԵՄ-ի կողմից համապատասխան մանդատի հաստատումից հետո կողմերը կարող են ոչ պաշտոնական բանակցություններ սկսել ոչ արտոնագրային ռեժիմի անցնելու մասին:
Մոսկվան բազմիցս հայտարարել է ԵՄ-ի հետ վիզային ռեժիմի պարզեցման, իսկ այնուհետև նաև վերացման իր շահագրգռվածության մասին: Ռուսական իշպանությունների կարծիքով, դա զգալիորեն կընդլայնի Ռուսաստանի և ԵՄ երկրների առևտրատնտեսական և մարդասիրական կապերը: Վիզային ռեժիմի վերացման ուղղությամբ համատեղ քայլերի ցանկի ձևավորման և բանակցային խմբերի ստեղծման մասին որոշումն ընդունվել է ՌԴ-ԵՄ գագաթնաժողովից հետո՝ 2010 թվականի դեկտեմբերին: -0-Ն.Ա.
