Պուտինը չորսուկես ժամվա ընթացքում պատասխանել է ռուսաստանցիների 88 հարցի

ՌԴ վարչապետ Վլադիմիր Պուտինը գերազանցել է ռուսաստանցիների հետ ուղիղ եթերում շփվելու տևողության իր սահմանած ռեկորդը՝ ավելի քան չորսուկես ժամվա ընթացքում պատասխանելով 88 հարցի, հաղորդում է «ՌԻԱ Նովոստին»:

Թվով տասներորդ հոբելյանական «ուղիղ կապը» մեկնարկել է Մոսկվայի ժամանակով ժամը 12:00-ին և ավարտվել է 16:32-ին: 2010 թ.-ին նույն ծրագիրը տևել էր ռեկորդային 4 ժամ 26 րոպե:

«Զրույց Վլադիմիր Պուտինի հետ. Շարունակություն» ծրագրի ընթացքում ՌԴ վարչապետը հասցրել է պատասխանել 88 հարցի, որոնցից 25-ը վերաբերում էին խորհրդարանական ընտրությունների արդյունքներին, առաջիկա նախագահական ընտրություններին, ռուսական կուսակցություններին, Պուտինի քաղաքական ծրագրերին, կադրային հարցերի և այլն: Տեղի է ոնեցել մարզերի հետ հինգ միացում, որոնց թվում են Ստավրոպոլը, Վլադիվոստոկը, Ուֆան, Սոչին, Նիժնի Տագիլը:

Ուղիղ եթերում ևս վեց զանգ է ստացվել Բաշկիրիայից, Տյումենից, Պետերբուրգից, Սարանսկից, Մուրմանսկից և Մոսկվայից:

Ստուդիայում գտնվող հյուրերը Պուտինին 18 հարց են ուղել, ևս 22 հարց վարչապետն ինքն է ընտրել: Մի քանի հարց նրան են ուղել ծրագրի հաղորդավարները:

«Ուղիղ կապի» հաղորդավարների տվյալներով՝ 1,882 մլն զանգերից և sms-հաղորդագրություններից, որոնք Մոսկվայի ժամանակով ժամը 15:30-ին ստացվել են հատուկ կենտրոն, ռուսաստանցիներին ամենից շատ հուզում են սոցիալական սպասարկմանը, սոցիալական պաշտպանությանը վերաբերող հարցերը, երկրորդ տեղում են բնակարանային-կոմունալ հարցերը, երրորդ տեղում են աշխատանքին և աշխատավարձին վերաբերող հարցերը:

Պուտինին նաև անձնական բնույթի հարցեր են ուղղվել՝ ինչի՞ մասին է երազում, որտե՞ղ է դիմավորելու Նոր տարին, ո՞րն է նրա համար երջանկությունն ու իր բնավորության ո՞ր գծերն է բացասական համարում:-0-