ԵՐԵՎԱՆ, 16 նոյեմբերի. /Նովոստի-Արմենիա/. Ըստ Հասարակական կարծիքի ուսումնասիրման համառուսական կենտրոնի (ՀԿՈւՀԿ) հարցման՝ ռուսների միայն 7 տոկոսն է Հայաստանին վստահելի գործընկեր համարում:
ԱՊՀ երկրների շրջանում Ռուսաստանի ամենավստահելի գործընկերների եռյակը չի փոխվել՝ առաջին տեղում է Ղազախստանը, որը զգալիորեն ամրապնդել է իր վարկանիշը (2010 թ.-ին Ղազախստանի օգտին է պատասխանել հարցվածների 37 տոկոսը, 2011 թ.-ին՝ 42 տոկոսը): Կրկին երկրորդ տեղում հայտնված Բելառուսը բարելավել է վստահության իր վարկանիշը՝ հասցնելով 36 տոկոսի (2010 թ.-ին այն 23 տոկոս էր): Ուկրաինան, որը երրորդ տեղն է զբաղեցրել, նվազեցրել է իր ցուցանիշը (2010 թ.-ին գրանցված 21 տոկոսից մինչև 15 տոկոս):
ԱՊՀ մնացած երկրները շատ ավելի հազվադեպ են նշվում ռուսների կողմից՝ Հայաստան (7 տոկոս), Ադրբեջան (5 տոկոս), Մոլդովա, Ուզբեկստան, Ղրղզստան (3-ական տոկոս), Թուրքմենստան (2 տոկոս): Վրաստանին և Տաջիկստանին վստահում է հարցվածների միայն 1 տոկոսը:
Ռուսների կարծիքով՝ Ղազախստանը նախկինի պես մնում է ԱՊՀ տարածքում ամենակայուն և հաջող պետությունը (42 տոկոս, 2010 թ.-ին ՝ 34 տոկոս): Երկրորդ տեղում է Բելառուսը (35 տոկոս, 2010 թ.-ին՝ 31 տոկոս): Առաջատարների եռյակը էական տարբերությամբ եզրափակում է Ուկրաինան՝ փոքր ինչ նվազեցնելով ցուցանիշը՝ 17 տոկոս (2010 թ.-ին՝ 19 տոկոս):
Այնուհետև գալիս են Հայաստանն ու Ադրբեջանը (9-ական տոկոս), Մոլդովան (5 տոկոս), Թուրքմենստանը (4 տոկոս), Ուզբեկստանը (4 տոկոս), Վրաստանը (3 տոկոս): Ռուսների կարծիքով՝ ավելի պակաս կայուն պետություն է Տաջիկստանը (1 տոկոս):
ԱՊՀ երկրների առաջնորդների թվում ռուսների շրջանում առավել շատ վստահություն է վայելում Ղազախստանի նախագահ Նուրսուլթան Նազարբաևը (37 տոկոս՝ 2010 թ.-ին գրանցված 32 տոկոսի համեմատ): Վարկանշային աղյուսակի երկրորդ հորիզոնականը զբաղեցնում է Բելառուսի նախագահ Ալեքսանդր Լուկաշենկոն, որի նկատմամբ վստահության մակարդակն աճել է՝ նախորդ տարի գրանցված 28 տոկոսի համեմատ (16 տոկոս և 2010 թ.-ին վարկանիշում երկրորդ հորիզոնականը): Առաջնորդների եռյակը եզրափակում է Ուկրաինայի առաջնորդ Վիկտոր Յանուկովիչը, որի նկատմամբ վստահության մակարդակը նվազել է (2010 թ.-ի 17 տոկոսից՝ դառնալով 12 տոկոս):
Այնուհետև գալիս են Ադրբեջանի նախագահ Իլհամ Ալիևը (7 տոկոս), ՀՀ նախագահ Սերժ Սարգսյանը (6 տոկոս), Ուզբեկստանի նախագահ Իսլամ Քարիմովը (3 տոկոս), Ղրղզստանի նախագահ Ռոզա Օտունբաևան, Թուրքմենստանի նախագահ Գուրբանգուլի Բերդիմուխամեդովը, Մոլդովայի նախագահի պաշտոնակատար Միհախ Գիմպուն, Վրաստանի նախագահ Միխայիլ Սահակաշվիլին (2-ական տոկոս): Ռուսաստանցիների վստահության ամենացածր վարկանիշը Տաջիկստանի առաջնորդ Էմոմալի Ռախմոնինն է (1 տոկոս):
ՀԿՈւՀԿ-ի կողմից անցկացված համառուսական հարցումն անցկացվել է 2011 թ.-ի հոկտեմբերին: Հարցմանը մասնակցել է 1600 մարդ Ռուսաստանի 46 մարզերի, երկրամասերի և հանրապետությունների 138 բնակավայրերից: Վիճակագրական անճշտությունները չեն գերազանցում 3,4 տոկոսը:
ԱՊՀ և Բալթյան երկրներում հարցումն անցկացվել է 2011 թ.-ի հոկտեմբերին: Հարցմանը մասնակցել է 4577 մարդ Բելառուսում (1077 մարդ), Ղրղզստանում (1500 մարդ), Ադրբեջանում (1000 մարդ), Լիտվայում (1000 մարդ):-0-
