Մինսկի ահաբեկչության իրականացողները բարոյական և ֆիզիկական այլանդակներ են. ՀՀ-ում Բելառուսի դեսպան

ԵՐԵՎԱՆ, 12 ապրիլի. /Նովոստի-Արմենիա/. Մինսկում տեղի ունեցած ահաբեկչության իրականացնողները  բարոյական և ֆիզիկական այլանդակներ են, կարծում է ՀՀ-ում Բելառուսի դեսպան Ստեփան Սուխորենկոն:

«Կարելի է մի բան ասել. նա, ով այս ամենն արել է, չարագործ է, բարոյական և ֆիզիկական այլանդակ: Ամենագլխավորն այն է, որ նա չխուսափի պատժից», - «Նովոստի-Արմենիա» գործակալությանը տված հարցազրույցում ասաց Սուխորենկոն:

Նրա խոսքերով՝ այս հանցագործությունը էմոցիոնալ շոկ է առաջացնում:

«Հիմա դժվար է նույնիսկ անհավանական տարբերակ առաջ քաշել: Դուք գիտեք, որ մեր հանրապետությունը հանգիստ, խաղաղ, ամբողջովին չեզոք, անկախ պետություն է, և հանկարծ այպիսի բան է տեղի ունենում... Ժամանակը ցույց կտա, թե ինչն է այս ամենը հետևում կանգնած, սակայն հիմա դեռ շատ դժվար է», - ասաց Սուխորենկոն, ով ավելի վաղ գլխավորել է Բելառուսի պետական անվտանգության կոմիտեն:

Նրա խոսքերով՝ «ոչ մի կերպ հնարավոր չէ գտնել ահաբեկչության ուղղությունը»:

«Եթե գոնե լինեին ինչ-որ ակնհայտ և կամ գաղտնի նախադրյալներ, սպառնալիքներ... Ազգամիջյան և միջկրոնական իրավիճակը մեզ մոտ խաղաղ է, ահաբեկչության համար ներքին նախադրյալներ ևս չկան: Հասարակությունը հանգիստ է, համբերատար, չի հանդուրժում ահաբեկչությունը: Ավելին, մենք միշտ վերապրել և ցավել ենք այն իրադարձությունների համար, որոնք տեղի են ունեցել Ռուսաստանում, այդ պատճառով շատ դժվար է որևէ կոնկրետ, համարժեք բան ասել», - ասաց դեսպանը:

Սուխորենկոն նշեց, որ հաշվի առնելով Պետական անվտանգության կոմիտեում իր 25-ամյա աշխատանքը՝ ինքը փորձում է որևէ դրդապատճառ գտնել, սակայն շատ դժվար է որևէ կոնկրետ տարբերակ գտնել:

Մինսկի «Օկտյաբրսկայա» մետրոյում պայթյուն է տեղի ունեցել երկուշաբթի, երբ մետրոյում մեծ թվով մարդիկ են եղել: Վերջին տվյալներով՝ մահացել է 12, վիրավորվել ավելի քան 150 մարդ, որոնցից 22-ն այժմ ծանր վիճակում են: Բելառուսի գլխավոր դատախազությունը տեղի ունեցածը ահաբեկություն է որակել: -0-