Գազատարի վրացական հատվածի վերահսկողությունը հնարավորություն կտա Բաքվին ընդլայնել Հայաստանի վրա ազդեցության մեխանիզմների շրջանակը
Շաբաթ օրը աշխատանքային այցով Երևան էր այցելել Վրաստանի նախագահ Միխայիլ Սահակաշվիլին: Շատերի կարծիքով՝ քննարկման հիմնական թեման «Հյուսիս-Հարավ» գազատարի վրացական հատվածը վաճառքի հանելու Վրաստանի ծրագրերն էին, որով Հայաստանը ստանում է ռուսական գազը: Այժմ խողովակը ցանկանում են գնել ռուսական «Գազպրոմը», Թուրքիան, Հայաստանն ու Ադրբեջանը:
Ինչպես կարծում են հայազգի վերլուծաբանները, եթե Վրաստանը ստիպված լինի պոտենցիալ գնորդների ցուցակից ընտրություն կատարել, ապա, ամենայն հավանականությամբ, դա կլինի Ադրբեջանը, որը վերահսկում է Վրաստանի գազի շուկայի զգալի մասը:
«Բազիս» տնտեսական ամսագրի գլխավոր խմբագիր Աշոտ Արամյան. «Թբիլիսիի հետ բանակցություններում Ադրբեջանի ակտիվությունը հասկանալի է: Գազատարի վրացական հատվածի վերահսկողությունը Ադրբեջանին հնարավորություն կտա ընդլայնել ղարաբաղյան հարցում Հայաստանի վրա ազդեցության մեխանիզմները»:
Վրաստանի իշխանությունները չեն կարող չհասկանալ, թե ինչ է սպասում Հայաստանին գազի գլխավոր աղբյուրի կորստի դեպքում: Որքանո՞վ է Վրաստանի կառավարությունը պատրաստ գնալ բացահայտ անբարյացակամ քայլի հարևան պետության նկատմամբ: Ընդ որում բացառված չէ, որ Միխայիլ Սահակաշվիլին կցանկանա լուծել խնդիրը՝ վաճառելով գազատարի հատվածը «Գազպրոմին», ինչի համար կպահանջվի Երևանի միջնորդությունը:
