ՀԱՊԿ-ն կողմ է ՆԱՏՕ-ի հետ գործնական փոխգործակցությանը հակաահաբեկչության, զանգվածային ոչնչացման զենքի տարածման և նարկոտրաֆիկի դեմ պայքարի ոլորտում, ինչպես նաև բնական և տեխնածին աղետների հետևանքների վերացման դեպքում, երեքշաբթի հայտարարեց կազմակերպության գլխավոր քարտուղար Նիկոլայ Բորդյուժան՝ հանդես գալով Դաշնային խորհրդում ։
«Արևմտաեվրոպական ուղղությամբ շարունակվում է ՆԱՏՕ-ի ռազմական ենթակառուցվածքի մոտեցման գործընթացը ՀԱՊԿ պատասխանատվության գոտու սահմաններին, ինչը չի կարող մեզ չանհանգստացնել։ Ակնհայտ է սպառազինությունների մրցարշավի իրական վտանգը, լարվածության և անվստահության աճի մակարդակի ավելացումը»,- ասել է նա, հաղորդում է «ՌԻԱ Նովոստին»։
Բորդյուժայի խոսքերով՝ լարվածությունը հանելուն կաջակցի փոխգործակցությունը ՌԴ և ՆԱՏՕ-ի միջև, ինչպես նաև ՀԱՊԿ և ՆԱՏՕ-ի միջև։
Խոսելով Անդրկովկասում իրավիճակի մասին՝ նա նշեց, որ այնտեղ իրավիճակի կայունացմանը չի նպաստում «վրացական ղեկավարության դիրքորոշումը, հակառուսական հիսթերիայի խտացման նրա ակցիաները և արևմտյան երկրների օգնությամբ ռազմական ներուժի վերականգնման նրա քայլերը»։ Բորդյուժան նաև մտահոգություն հայտնեց Ադրբեջանի ռազմական բյուջեի «ոչ համաչափ» աճի կապակցությամբ։
Միաժամանակ նա ավելացրեց, որ կովկասյան տարածաշրջանում իրավիճակի նկատմամբ ապակայունացնող ազդեցություն է գործում նաև Հյուսիսային Կովկասի հանրապետությունների իրադարձությունները, ծայրահեղականության դրսևորումները Դաղստանում, Ինգուշեթիայում, Կաբարդինո Բալկարիայում, Կարաչաևո Չերկեսիայում և Չեչնիայում։
Խոսելով Կենտրոնական Ասիայի տարածաշրջանում ստեղծված իրավիճակի մասին՝ ՀԱՊԿ գլխավոր քարտուղարն այն «բարդ» համարեց՝ լարվածության հետագա աճի սուր արտահայտված հեռանկարով։ Այստեղ, նրա խոսքերով, հավաքական անվտանգության համար իրական վտանգ ներկայացնող գլխավոր ապակայունացնող գործոնը վերջին ժամանակներում ծայրահեղական և ահաբեկչական ուժերի նկատելի ակտիվացումն է, ինչպես նաև Աֆղանստանից հանցավոր խմբավորումների գործողությունները մի շարք կենտրոնասիական պետությունների սահմանամերձ տարածքներ տեղափոխելու փորձերը։
«Ապակայունացնող գործոն են նաև արմատական իսլամիզմի կողմնակիցների թվի աճը, երբեմն մարդկային զոհերի պատճառ հանդիսացող միջազգային հակասությունների սրումը, ջարդերն ու զանգվածային անկարգությունները»,- ասաց Բորդյուժան։
ՀԱՊԿ կազմում են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը, Ուզբեկստանը։ -0-
