Հայաստանը Ռուսաստանին է հանձնել Նովգորոդի հանցավոր խմբավորման ենթադրվող պարագլուխներից մեկին

ԵՐԵՎԱՆ, 25 հոկտեմբերի. /Նովոստի-Արմենիա/. Հայաստանը Ռուսաստանին է հանձնել դրամաշորթության մեջ մեղադրվող, Նովգորոդի հանցավոր խմբավորման ենթադրվող պարագլուխներից մեկին՝ Թելման Մխիթարյանին, երկուշաբթի «ՌԻԱ Նովոստիին» տեղեկացրել է Նովգորոդի շրջանային ՆԳՎ-ի ներկայացուցիչը՝ չնշելով հանձնման ամսաթիվը:

«Մխիթարյանը գտնվում է Մոսկվայի «Մատրոսկայա տիշինա» մեկուսարանում», - ասել է գործակալության զրուցակիցը:

Նա դժվարացել է պատասխանել այն հարցին, թե, արդյո՞ք, Մխիթարյանին տանելու են Վելիկի Նովգորոդ:

«Հանցավորման խմբավորման մյուս պարագլուխները նախկինի պես հետախուզման մեջ են», - ավելացրել է ՆԳՎ-ի ներկայացուցիչը:

Վելիկի Նովգորոդի պատվավոր քաղաքացի Մխիթարյանը «Նովգորոդի ապակե մանրաթելի գործարան», «Շիննախագիծ» բաժնետիրական միավորումների և մի շարք այլ ձեռնարկությունների ու կազմակերպությունների ղեկավարն էր: Հետխորհրդային շրջանում նա վերահսկել է շրջանի տնտեսության զգալի մասը:

Մխիթարյանը Նովգորոդի նախկին մարզպետ Միխայիլ Պրուսակի պաշտոնավարման ժամանակ զբաղեցրել է մարզպետի քաղաքական հարցերով խորհրդականի պաշտոնը:

Անձը չհաստատված հանցագործները 2005 թ.-ի հունիսին Վելիկի Նովգորոդում ռադիոկառավարվող պայթուցիկ սարքի օգնությամբ մահափորձ են կատարել Մխիթարյանի նկատմամբ: Վերջինս մահափորձի հետևանքով չի տուժել:

Մխիթարյանը ՔՕ 163-րդ հոդվածի երրորդ մասի (դրամաշորթություն) հատկանիշներով հարուցված գործի հիմնական դերակատարներից է: Այդ հոդվածը նախատեսում է 7-15 տարի ազատազրկում՝ մինչև մեկ միլիոն ռուբլի տուգանքի վճարմամբ:

Մխիթարյանը թաքնվել էր արդարադատությունից, նրա նկատմամբ դաշնային և միջպետական հետախուզում էր հայտարարվել:

Իրավապահները ձերբակալել են նրան օգոստոսի 24-ին Երևանում: Գործակալությունը չունի Մխիթարյանի պաշտպանող կողմի մեկնաբանությունները:-0-