ՀԱՊԿ համատեղ ձեռնարկությունների ստեղծումը կքննարկեն կազմակերպության երկրների ներկայացուցիչները
Ռազմական նշանակության ապրանք արտադրող ՀԱՊԿ երկրների միջպետական գիտա-արտադրական միավորումների ստեղծման հարցերն ուրբաթ Մոսկվայում կայանալիք Ռազմատնտեսական համագործակցության միջպետական հանձնաժողովի նիստի ժամանակ կքննարկեն Կազմակերպության պետությունների ներկայացուցիչները, հաղորդում է «ՌԻԱ Նովոստին»՝ հղում անելով ՀԱՊԿ քարտուղարությանը։
Միջոցառուման ժամանակ անդրադարձ կլինի նաև ՀԱՊԿ շրջանակներում պաշտպանական արտադրանքի ստանդարտացման խնդիրներին և ՀԱՊԿ անդամ պետությունների հավաքական անվտանգության համակարգի ուժերի և միջոցների կառավարման համակարգի ստեղծման ծրագրի մշակման առաջարկներին։
«Կքննարկվեն նաև ռազմական նշանակության ապրանք արտադրող ՀԱՊԿ միջպետական գիտա-արտադրական միավորումների ստեղծման, ռազմական նշանակության արտադրանքի մշակման, շահագործման, նորոգման, արդիականացման, շահագործման ժամկետների երկարացման և ուտիլիզացիայի խնդիրների լուծման և ՀԱՊԿ անդամ պետությունների ռազմական տեխնիկայի և սպառազինության տեղեկատվական համատեղելիության ու տեխնիկական ապահովման հարցերը»,- նշում է քարտուղարության մամուլի ծառայությունը։
ՀԱՊԿ-ի կազմում են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը և Ուզբեկստանը։ -0-
