ՌԴ ռազմածովային նավատորմի հրամանատարությունը քննարկում է արտերկրում նավերի տեղակայման հարցը. Գլխավոր հրամանատար

ԵՐԵՎԱՆ, 2 օգոստոսի. /Նովոստի-Արմենիա/. Ռուսաստանը հետաքրքրված է արտերկրում ռազմածովային նավատորմի նավերի տեղակայմամբ, սակայն այս ուղղությամբ մտադիր է աշխատել առանց խուճապի, «ՌԻԱ Նովոստիին» տեղեկացրել է ՌԴ ռազմածովային նավատորմի գլխավոր հրամանատար, ադմիրալ Վլադիմիր Վիսոցկին:

Այժմ Ռուսաստանն ունի Տարտուսում (Սիրիա) տեղակայված միակ արտերկրյա ռազմածովային բազան: «Արտերկրում տեղակայման հնարավորությունը լավ բան է, սակայն դա պետք է անել աստիճանաբար՝ հաշվի առնելով երկրի հնարավորությունները», - ասել է գլխավոր հրամանատարը:

Նրա խոսքերով՝ աշխարհի բազմաթիվ պետություններ այդպես են վարվում: «Մենք դրանից կօգտվենք: Խոսքն, առաջին հերթին, այն երկրների մասին է, որոնք նավահանգստային լավ ենթակառուցվածք ունեն», - ասել է Վիսոցկին:

Նա պարզաբանել է, որ այդ երկրներում նավահանգստային գոտին գտնվում է այն շրջանների մոտակայքում, որտեղ օպերատիվ կերպով ներկա են ՌԴ ռազմածովային նավատորմի նավերը: «Օրինակ, եթե դա Միջերկրական ծովի և Սև ծովի արևելյան գոտին է, ապա այդ երկրներն են Թուրքիան և Հունաստանը: Ընդ որում երկու պետություններն էլ մեզ այդ հնարավորությունը տալիս են: Բացի այդ, այժմ զգալի կերպով բարելավել են հարաբերությունները Իտալիայի հետ, իսկ դա արդեն Միջերկրական ծովի արևմտյան գոտին է», - ասել է Վիսոցկին:

Վիսոցկու ամբողջական հարցազրույցը կարող եք ընթերցել «ՌԻԱ Նովոստիի» կայքում:-0-