Վրաստանի նախագահը չի հասկանում իր նկատմամբ Ռուսաստանի պահանջները

Վրաստանի նախագահ Միխայիլ Սահակաշվիլին չի հասկանում իր նկատմամբ Ռուսաստանի ներկայացրած պահանջները:

Մոսկվան հրաժարվում է գործ ունենալ Սահակաշվիլու հետ այն բանից հետո, երբ 2008 թ.-ի օգոստոսին վրացական զորքն ավերեց Հարավային Օսեթիայի մայրաքաղաք Ցխինվալին, իսկ վրացի զինվորականները սպանում էին ռուս խաղաղարարներին:

«Դժվար է հասկանալ, թե ինչ են նրանք ուզում, մենք ժամանակին ցանկանում էինք ընդառաջ գնալ, սակայն երբ մենք ինչ-որ բան էինք զիջում, նրանք (Ռուսաստանը) ավելին էին ցանկանում», - ասել է Սահակաշվիլին բելառուսական հեռուստատեսության եթերում, հաղորդում է «ՌԻԱ Նովոստին»:

Ռուսաստանի ղեկավարությունը հայտարարում էր, որ հույս ունի բարելավել հարաբերությունների Վրաստանի հետ, երբ այնտեղ փոխվի նախագահը:

Սահակաշվիլին կարծում է, որ Ռուսաստանի և Վրաստանի լարված հարաբերությունները բացասաբար են անդրադառնում Վրաստանում ռուսական մշակույթի ներկայության վրա:

«Ես միշտ ասել եմ, որ ես Վրաստանի միգուցե վերջին կամ նախավերջին նախագահն եմ, ով կարող է մեջբերել Պուշկինին, Լերմոնտովին, Բրոդսկուն, Եսենինին: Կանցնեն սերունդներ, և նոր սերունդն արդեն չի իմանա, թե ինչ է Ռուսաստանն ու որտեղ է այն գտնվում», - ասել է Սահակաշվիլին:

Վրաստանի նախագահը նաև հայտարարել է, որ իր որդուն ստիպում է ռուսերեն սովորել: «Նա ասում է, որ ոչ ոք շուրջբոլորը ռուսերեն չի սովորում և հարցնում է, թե ինչի համար է դա պետք», - պարզաբանել է Սահակաշվիլին:-0-