Օսմանյան կայսրությունում 1915-1923 թթ.-ին տեղի ունեցած Հայոց ցեղասպանության զոհերի հիշատակին նվիրված ցուցահանդեսներ են երեքշաբթի բացվել Ռոստովում և երկրամասի Մյասնիկովյան շրջանում: Ցուցահանդեսներին ներկայացված են լուսանկարների, նկարների և տպագիր տեքստերի շուրջ 40 ռեպրոդուկցիաներ, հաղորդում է «ՌԻԱ Նովոստիի» թղթակիցը:
Ցուցահանդեսների կազմակերպիչներն են «Դոնի Նոր Նախիջևանի հայկական համայնքի» անդամները:
«Բացի գրադարանից նման ցուցահանդեսներ են բացվել Ռոստովի ինը բուհերում և երկրամասի Մյասնիկյան շրջանի երկու մշակութային հաստատություններում: Նրանք նույնական են, քանի որ ռեպրոդուկիցաներն արվել են համայնքի արխիվներում պահվող բնօրինակներից: Այնտեղ ընդհանուր առմամբ շուրջ 100 լուսանկարներ և նկար է պահվում, սակայն ներկայացված է միայն մի մասը, մյուսները որոշեցինք չցուցադրել, քանի որ դրանք չափազանց սարսափազդու են: Մենք նաև ցուցահանդեսին ներկայացրել ենք այն ժամանակվա օտարերկրյա թերթերի հրապարակումներն ու հայտնի քաղաքական գործիչների, գրողների և մշակութային գործիչների հայտարարությունները», - պարզաբանել է ցուցահանդեսի կազմակերպիչ Գայանե Գևորգյանը:
Նրա խոսքերով՝ ցուցահանդեսները Հայոց ցեղասպանության 95-րդ տարելիցին նվիրված «Դոնի Նոր Նախիջևանի հայկական համայնքի» կողմից անցկացվող մի շարք միջոցառումների առաջին փուլն են:
Հիմնական միջոցառումները կանցկացվեն ապրիլի 24-ին՝ Հայոց ցեղասպանության զոհերի հիշատակի օրը: «Այդ օրը ծրագրվում է Ռոստովի փողոցներում կազմակերպել զանգվածային երթեր, որոնցում ակնկալվում է շուրջ 2 հազար մարդու մասնակցություն», - ավելացրել է Գայանե Գևորգյանը:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
