ԵՐԵՎԱՆ, 22 ապրիլի. /Նովոստի-Արմենիա/. Ռուսաստանցիների երկու երրորդը կարծում է, որ Ռուսաստանն աշխարհում դրական դեր է խաղում և վտանգ չի ներկայացնում այլ երկրների համար, վկայում են BBC-ի Ռուսական ծառայության պատվերով կատարված հասարակական կարծիքի հարցման արդյունքները։
Հարցումն անցկացվել է GlobeScan ընկերության և նրա ռուսական գործընկեր «Ցեսի» ընկերության կողմից փետրվարի 6-17-ն ընկած ժամանակահատվածում Ռուսաստանի տարբեր մարզերում` 1,012 հազար քաղաքացիների շրջանում։ Ինչպես ցույց է տալիս հարցումը, չափահաս ռուսաստանցիների 66 տոկոսը կարծում է, որ աշխարհում իրենց երկիրը բարության գլոբալ ուժ են համարում։ Հարցվածների միայն 13 տոկոսն է կարծում, որ այլ երկրները Ռուսաստանի մեջ խաղաղության նկատմամբ կամ հարևանների նկատմամբ վտանգ են տեսնում (12 տոկոս)։
Հարցվածների ուղիղ կեսը կարծում է, որ Ռուսաստանը պետք է օգտագործի իր հզորությունն ու ազդեցությունը միջազգային խնդիրների լուծման գործում այլ երկրների հետ համագործակցության ժամանակ։ Սակայն հարցվածների 26 տոկոսը կարծում է, որ Ռուսաստանը պետք է օգտագործի իր ուժն ու ազդեցությունը սեփական շահերը պաշտպանելու համար։ Միայն 14 տոկոսն է կարծում, որ երկիրը պետք է կենտրոնանա ԱՄՆ-ի գլոբալ լիդերությանն այլընտրանք ապահովելու վրա։
Երկրները, որոնց ռուսաստանցիները առավել հաճախ են համարում աշխարհում հիմնական դաշնակիցներ, նախկին խորհրդային հանրապետություններն են՝ Բելառուսը՝ (38 տոկոս) և Ղազախստանը (23 տոկոս)։
Միջազգային քաղաքական դաշտում կարևոր խաղացողների թվում 14 տոկոսը հիմնական դաշնակից է համարում Չինաստանը, 13 տոկոսը՝ Գերմանիան և 11 տոկոսը՝ Ֆրանսիան։ Գրեթե յուրաքանչյուր տասներորդն ասում է, որ Ռուսաստանը դաշնակիցներ չունի (12 տոկոս)։
Ի պատասխան Ռուսաստանի ամենալուրջ ներքին խնդրի մասին հարցի՝ հարցվածների 31 տոկոսը նշում է նվազող կենսամակարդակը կամ ֆինանսական տագնապները։ 17 տոկոսը կարծում է, որ դա բարձր գները կամ գնաճն է։ Հարցվածների 23 տոկոսը Ռուսաստանի գլխավոր խնդիրը կոռուպցիան է համարում։
«Ակնհայտ է, որ նավթային և գազային բումը ռուսաստանցիներին վստահություն ներշնչեց, որ իրենց երկիրը մեծ դեր կարող է խաղալ աշխարհում, այլ ոչ թե քնած հսկա մնալ միջազգային գործերում, որ այն դրական ուժ է աշխարհում», - այսպես է մեկնաբանել հարցումների արդյունքները GlobeScan ընկերության տնօրեն Սեմ Մաունթֆորդը։
Միաժամանակ, նրա խոսքերով, տնտեսական ճգնաժամն ու ռեցեսիան կարող են Ռուսաստանում սոցիալական լարվածության աճ հրահրել։-0-
