Հայտնի երգիչ Վալերի Լեոնտևը իր 60-ամյա հոբելյանը կտոնի Սանկտ Պետերբուրգում կայանալիք ավանդական համերգներով և իր երգերի նորովի մատուցմամբ, «ՌԻԱ Նովոստիին» պատմել է արտիստի պրոդյուսեր Նիկոլայ Կարան։
«Մենք, ինչպես միշտ, Սանկտ-Պետերբուրգում մենահամերգներ կունենանք։ Մարտի 18-ին, 19-ին, 21-ին և 22-ին Լեոնտևը կներկայացնի «Սիրում եմ, կարոտում եմ, սպասում եմ...» շոուն, որտեղ նրան կշնորհավորեն ընկերներն ու գործընկերները», - պատմել է Կարան։
«Լեոնտևի ծննդյան օրը համերգից հետո Պետերբուրգի հրապարակում տեղի կունենա տոնական հրավառություն», - ասել է նա։
Հյուսիսային մայրաքաղաքում կայանալիք հոբելյանական համերգների ժամանակ հոբելյարը հանդիսատեսին կներկայացի ինչպես հին, այնպես էլ նոր երգեր, որոնց թվում են Վլադիմիր Եվզերովի «Մերի», Կիմ Բրայտբուրգի «Թափառաշրջիկ-ակորդեոն», Գենադի Պրիվալովի «Պետերբուրգ», «Օգնիր» երգերն ու «Կոնդորի թռիչքը» հայտնի պերուական ստեղծագործությունը։
«ՌԻԱ Նովոստիի» այն հարցին, թե արդյո՞ք Լեոնտևը հոբելյանական երեկո կանցկացնի Մոսկվայում, երգչի պրոդյուսերը պատասխանել է, որ «նման համերգներ չեն ծրագրվել»։
«Պարզապես մենք որոշեցինք անել այնպես, ինչպես անում ենք միշտ՝ քառորդ դարի ավանդույթները չխախտելու համար», - պարզաբանել է նա՝ նշելով, որ հենց «Օկտյաբրսկի» համերգասրահում կայանալիք համերգներով է Լեոնտևը ամեն տարի նշում իր ծննդյան օրը։
Բացի այդ Լեոնտևի հոբելյանի կապակցությամբ ծրագրվում է թողարկել նոր ալբոմ՝ «Ճանապարհորդության տարիներ», որտեղ ներկայացված կլինի նոր ստեղծագործություններ և տարբեր տարիների ոսկե հիթերը՝ միանգամայն նոր գործիքավորմամբ։
Ալբոմում ներկայացված են Գենադի Պրիվալովի, Վլադիմիր Եվզերովի, Կիմ Բրայտբուրգի, Իլյա Բրիլինի նոր երգերը, ինչպես նաև Ռայմոնդ Պաուլսի, Իլյա Ռեզնիկի, Էդուարդ Արտեմևի, Նիկոլայ Զինովևի, Յուրի Չերնավսկու, Ալեքսանդր Մարկևիչի, Նիկոլայ Դենիսովի հիթերը։ Ձայնասկավառակում ներկայացված կլինի նաև 2008 թ.-ին Լեոնտևի ձայնագրած El condor pasa հիթը։
Երգչի ծննդյան օրվա կապակցությամբ ծրագրվում է թողարկել նաև հատուկ ֆոտոալբոմ, իսկ ՌԴ Առաջին ալիքով կցուցադրվի Վալերի Լեոնտևի մասին պատմող՝ Վյաչեսլավ Տկաչենկոյի վավերագրական ֆիլմը։
Լեոնտևը ծնվել է 1949 թ.-ի մարտի 19-ին Ուստ-Ուսա գյուղում (Կոմի)։ Այսօրվա դրությամբ երգիչը ձայնագրել է ավելի քան 30 սկավառակ և ձայներիզ, արժանացել է Ռուսաստանի ժողովրդական արտիստի, Ուկրաինայի վաստակավոր արտիստի կոչումների, «Պետրոս Մեծի I աստիճանի» և «Հայրենիքի առջև ունեցած վաստակի IV աստիճանի» շքանշանների ասպետի կոչումների։-0-
