Մոսկվայում տեղի կունենա «Կարդում ենք Պուշկին միասին. Ճանապարհորդություն դեպի Էրզրում. 180 տարի անց» միջազգային երիտասարդական ծրագիրը

ԵՐԵՎԱՆ, 5 մարտի. /Նովոստի-Արմենիա/. «Կարդում ենք Պուշկին միասին. Ճանապարհորդություն դեպի Էրզրում. 180 տարի անց» միջազգային երիտասարդական ծրագրի մեկնարկը տեղի կունենա մարտի 10-ին Մոսկվայի Ազգությունների տանը, հինգշաբթի «Նովոստի-Արմենիա» գործակալությանը տեղեկացրեցին Ռուսաստանի հայերի միության տեղեկատվական ծառայությունից։

«Այս ծրագրի նպատակը Մոսկվայի և Հայաստանի երիտասարդության միջև ազգամիջյան հարաբերությունների զարգացումն է՝ մշակույթների երկխոսության հիման վրա, մեծանուն ռուս բանաստեղծ Ալեքսանդր Պուշինի պոեզիայի հետ շփվելու միջոցով», - ասվում է տեղեկատվության մեջ։

Ծրագիրը ներառում է մասնակիցների կողմից Ա.Ս.Պուշկինի «Ճանապարհորդություն դեպի Էրզրում» ստեղծագործության միասին ընթերցում և ստեղծագործական մրցույթներ, որոնք կանցկացվեն Մոսկվայի Ազությունների տանը: Մարտի 17-ին կանցկացվի բանաստեղծական մրցույթ, մարտի 24-ին՝ գեղարվեստական խոսքի, մարտի 31-ին՝ վոկալի մրցույթ։ Ապրիլի 7-ին կամփոփվեն ընթերցանության և ստեղծագործական մրցույթների արդյունքները։

Մրցույթների հաղթողները հնարավորություն կստանան այցելել Հայաստան՝ Մոսկվայի և Հայաստանի երիտասարդության միջազգային հանդիպմանը մասնակցելու համար, որը նվիրված է Ա.Ս.Պուշկինի 210-ամյակին, որը տեղի կունենա Երևանի Ռուս-հայկական (Սլավոնական) համալսարանում 2009 թ.-ի ապրիլի 25-29-ը։

Ծրագրի կազմակերպիչներն են Մոսկվայի Ազգությունների տունը, «Ռուսաստանի հայերի միություն» համառուսական հասարակական կազմակերպության մոսկովյան բաժանմունքը և Ի.Մ.Գուբկինի անվան նավթի և գազի ռուսական պետական համալսարանը։-0-