Մոլդովան Էրմիտաժին կվերադարձնի երկու գողացված նկար

Մոլդովան Ռուսաստանին կվերադարձնի իր տարածքում հայտնաբերված նկարները, որոնց կորուստը Էրմիտաժում հայտնաբերել են 2006 թվականին, հայտնեց Մոլդովայի նախագահ Վլադիմիր Վորոնինը Ռուսաստանի նախագահ Դմիտրի Մեդվեդևի հետ հանդիպմանը։

«Լավ նորություն կա։ Մեր մարմինները մեկուկես տարի օպերատիվ հետաքննություն էին վարում, և երեք օր առաջ հայտնաբերվել են երկու կտավներ, որոնք Էրմիտաժից գողացվել էին մի քանի տարի առաջ»,- ասաց Վորոնինը։ Նրա խոսքերով, առաջիկայում կտավները կվերադարձվեն Պետերբուրգի թանգարան, հաղորդում է ՌԻԱ Նովոստին։

«Հետաքննչական գործողություններից հետո մենք կվերադարձնենք կտավները Էրմիտաժ»,- ավելացրեց նախագահը։

Մեդվեդևն իր կողմից նշեց, որ դա լավ նորություն է։ «Հատկապես, որ ասվում է այս պատերի մեջ՝ Պետերբուրգում։ Շնորհակալություն»,- ավելացրեց նա։

2006 թվականի ամռանը ներթանգարանային ստուգման ընթացքում Էրմիտաժի ռուսական բաժնում հայտնաբերվել է 221 ցուցանմուշի կորուստ։ Հետաքննությունը բացահայտել էր, որ արվեստի գործերը թանգարանից դուրս են բերել բաժնի հսկիչ Լարիսա Զավադսկայան, ով մահացել է  ստուգումների ժամանակ, և նրա ամուսին Նիկոլայը։

Դատարանը պարզել է, որ տվյալ հանցագործային խմբում Լարիսա Զավադսկայային բաժին է ընկել հետևյալ դերը՝ թանգարանային ցուցանմուշների հետ տարվող աշխատանքների պատրվակով նա դրանք բերել էր իր սենյակ, իսկ հետո բացեիբաց դուրս բերել թանգարանից։ Զավադսկին մենակ կամ կնոջ հետ իրացրել է գողոնը անտիկվարի խանութներում և գրավատներում։ Մի քանի տասնյակ ցուցանմուշ գտնվել է և վերադարձվել թանգարան։

Նիկոլայ Զավադսկին մեղավոր է ճանաչվել թանգարանից գողություն անելու գործով և դատապարտվել հինգ տարի ազատազրկման։-0-