ԵՐԵՎԱՆ, 7 հունվարի./Նովոստի-Արմենիա/. Վրաստանի նախագահական ընտրությունները վկայում են, որ երկիրը շարժվում է դեպի եվրոպական ժողովրդավարություն, «Ասոշիեյթիդ Փրեսս» գործակալությանը տված հարցազրույցում հայտարարել է Միխայիլ Սահակաշվիլին։
«Ես կարծում եմ, որ շատ բաներ պետք է քննադատել, երկիրը դեռևս գտնվում է անցումնային փուլում, դեռևս չկա հասուն, կայացած հասարակություն, մենք դեռ շատ անելիքներ ունենք, բայց ես կարծում եմ, որ մենք ճիշտ ճանապարհին ենք, և այս ընտրությունները միայն ապացուցեցին դա»,- ասել է նա, հաղորդում է «ՌԻԱ Նովոստին»։
Սահակաշվիլին ընդդիմության հետ համագործակցելու պատրաստակամություն հայտնեց և հայտարարեց, որ վրացական հասարակության խորը պառակտման մասին կարծիքը չափազանցված է։
«Ես չէի չափազանցնի խորը պառակտման մասին գաղափարը։ Այս ընտրարշավը շատ լավ ընթացք ունեցավ։ Եթե որևէ մեկը ցանկացած նորմալ եվրոպական երկրում առաջին իսկ փուլում հավաքում է 50 տոկոսից ավելի, դա կոչվում է տպավորիչ հաղթանակ, և ես չեմ հասկանում, թե ինչու պետք է Վրաստանում այլ կերպ լինի»,- նշեց նա։
«Մենք պետք է համաձայնություն ստեղծենք, այո, մենք պետք է շատ հարցերում համաձայնության գանք։ Մենք երբեք համաձայնության չենք գա որոշ հարցերի շուրջ, քանի որ այդպես են գործերը ցանկացած ժողովրդավարական երկրում»,- կարծում է Սահակաշվիլին։
Նրա խոսքերով, ընդդիմության խաղաղ հավաքները ժողովրդավարական գործընթացի մաս են։ «Դա նորմալ է։ Յուրաքանչյուր ոք իրավունք ունի խաղաղ հավաքների։ Ես կարծում եմ, որ անթույլատրելի արարքներ տեղի չեն ունենա, բայց խաղաղ հանրահավաքները՝ քաղաքական արշավի ճանապարհներից են»,- ասաց նախագահի թեկնածուն։
Վերջին տվյալներով, Միխայիլ Սահակաշվիլին նախագահական ընտրությունների առաջատարն է՝ հավաքելով ընտրողների ձայների 51,85 տոկոսը, ինչը միանգամայն բավարար է ընտրությունների առաջին փուլում նրա հաղթանակի համար։
3 հազար 512 ընտրատարածքներից 2 հազար 722 ընտրատարածքների տվյալների հաշվարկով, Լևան Գաչեչիլաձեն հավաքում է 25,33% , Արկադի Պատարկացիշվիլին՝ 6,57%, Դավիթ Գամկրելիձեն՝ 3,92%, Շալվա Նաթելաշվիլին՝ 6,39% , Գեորգի Մաիսաշվիլին՝ 0,76%, Իրինա Սարիշվիլին՝ 0,2% ձայն։
2004թ. հունվարի 4-ին Վրաստանում տեղի ունեցած նախագահական ընտրություններին Սահակաշվիլին ստացավ քվեարկությանը մասնակցած ընտրողների ձայների 94 տոկոսը։--0—
